Fundman睇市：光控現投資價值

隔晚華爾街三大指數統統錄得百分之二以上升幅，是近月最強紀錄，港股裂口開高381點後，由頭升到尾，撐到破埋二萬關，收20,003點，升596點，要注意同近日一彈即散市況的最大分別，是主板成交由長期600幾億浮沉，激增至926億元，可見願意破位高追的基金的確唔少。

二線內房諗得過

近排見啲基金經理調查，普遍都話手頭現金比例已輾轉升至海嘯後新高，要知股市永遠是少數人睇啱，多數人睇錯的英雄地，企響口淡淡芬佬一面，就註定無運行食唔正今趟反彈浪潮，以逆向思維去諗，前日中國官方及財新製造業PMI，統統比街外預期差，個市居然都唔跌，尋日連評級都被降，乜壞消息都出晒，唔挾到九彩就有鬼。

尋日最感意外，反而係舊年畀政策市玩到謝一謝，居然仲有人賭兩會概念，死到唔死的煤炭、水泥、鋼鐵股升到爆，阿爺雖然話要全力由供應層面着手，去產能、去庫存拯救有關產業，但要救幾耐？肯定唔會一年半載見效果，中國鋼鐵業佔全球總產量超過五成，要減產談何容易？何況國企利益關係複雜，同時要面對大量低技術工人被下崗，引發社會不穩的考量，產業要治本的進行結構轉型，可以話綁手綁腳，實在好難令人樂觀。

純粹賭股市今浪小陽春，揀勝算較高的，都係搵番已經見效果，在寬鬆貨幣政策下被托起，而經營者又通街平錢可借的行業，即係房地產市場。尋日見就連航空母艦級別的華潤置地（01109）都炒到二三線一樣，狂升6.6%，數落去二線少少的內房如越秀地產（00123）、世房（00813）及雅居樂（03383）都可以諗諗。

今年醫藥股在兩會前夕普遍靜局，全國政協經已將深化醫藥衞生體制改革，放入重點議題，當中久聞樓梯響的推動中醫藥發展，預料亦有更多政策細則出台。既然個市轉為人棄我取、愈殘愈愛的新玩法，錯過咗尋日爆升的兩會概念股，不如搵啲未起步，穩穩陣陣的醫藥股等運到。

對內地中醫藥的規劃，國務院有晒時間表，望二○二○年推動中醫藥佔整個醫藥產值三成以上，當中又以中藥顆粒生意比較易睇。中國乜都有假，但性命攸關，中藥顆粒生意一直受國家嚴格監管，至今得六個經營牌照分別由五間公司持有。

中國中藥可冷敲

當中兩間香港上市公司分別係培力控股（01498）及中國中藥（00570），前者貨疏且去年業績會受上市費用影響，至於中國中藥市值比較大，較啱基金胃口之外，舊年上半年業績對辦，已連番測試4元樓下支持，完全未炒過，吼冷可以睇睇。

早前券商股風聲鶴唳，甚至一些管理層遭中證監調查，但現時風波已告平息，有助股價回穩。雖然A股風光不再，今年可能只在區間上落，滬綜指在3,000點附近已面臨不小阻力，更遑論券商要升至4,500點才可望沽售手上股票。券商一、二月佣金處於「食穀種」階段，但期望三月可以回升，而新股陸續放行，亦有助IPO收入，今年一、二月的最壞時刻相信已過。

昨券商股升得最勁的為廣發証券（01776），股價升7.7%；光大控股（00165）亦升7.46%，其股價相對較為平穩，除持有光大証券權益外，旗下多個基金投資一級及二級市場。集團每股資產淨值超過20元，現價存25%折讓，早前與母公司合資買下大新金融中心作長期投資，雖然買商廈並不是高回報投資，與發掘具潛質企業的創投投資冇得比，但辦公室除自用外亦可出租，光控亦只佔16.67%股權，相對其市值及資產值佔比甚低，股價弱勢反應過甚。