耶倫劇本，猶如公仔箱膠劇，大家老早估到劇情發展，只係死要等埋個結局。聯儲局加息四分之一厘，行出回歸利率正常化第一步，今年大落後的美股，在唔使再估估吓之下，三大指數升幅都超過1%，由於投資者預期較貨幣政策執行行前一大截，加息後美股似乎可以享受一個短暫的蜜月期，來一個似樣的修正。

目前南航估值，已過分反映人民幣貶值的不利因素。（資料圖片）

然後呢？聯儲局委員預測，明年底聯邦基金利率維持1.375厘不變，意味喺佢哋心目中，明年尚有1厘的加息空間，以一、三、四、六、七、九、十一及十二月，合共八次會議計，每兩次會議加一次息的可能性頗大。

當然，聯儲局預測年終利率仲係會因應通脹以及經濟復甦強度變更，如果強美元對經濟以及物價的壓抑作用比預期大，明年美國加唔到1厘都唔定，從一四、一五年零息期間，CPI都去唔到2%目標，加息後就更難，估計除非歐、日以及中國經濟都明顯復甦，可以逐步退出寬鬆措施，否則明年美國可以加息的幅度會十分有限。

市場冷靜迎加息

以為講咗N次的狼來了故事，主角終於登場，金融市場會好震撼？實情係加息後市場反應出奇冷靜，美股升純粹是追補一五年落後於歐股的反應，美匯指數繼續在98水平徘徊。人人以為會重災的新興市場，尋日巴西貸評畀惠譽降到垃圾級，但股市無反應，反而巴西法院禁制Whatsapp通訊四十八小時成為國際新聞，連放緊「產假」的朱克伯格，都要回應。

阿根廷取消外匯管制，其實都係搵藉口等官方價浮向黑市價，加入貨幣戰玩競貶去解決經濟停滯不前問題，之所以等埋美國加息至出招，都係驚死披索插水唔能夠一步到位無水花而已。

周三經已偷步的港股，尋日仲有170點的進帳，對於「大時代」以來長期積弱的大市而言，都算合格以上。美國加息，市場預期長短債孳息擴闊有利大型銀行的財資收入，沉咗一排的滙控（00005）以及渣打集團（02888）終於見報復式反彈。昨日滙控升2.8%，以61.8元收市；至於渣打表現更勁，全日升8.6%，收報61.85元。

尋日話炒成品油價唔減浪費時間，果然三桶油升勢一日玩完，紐約期油插到落35美元邊，海灣國真係愈窮愈見鬼。油元入不敷支，OPEC老大沙特財赤勢必失控，未來兩年債務佔GDP有機會飆到50%，隨時將現時相當全國產能一成六的閒置生產力推埋出街，油價已經跌入惡性循環的漩渦，除非嫌錢腥，否則無謂博反彈。

油價呈惡性循環

低油價下，高油耗行業如航空業本來最着數，不過幾隻中資航空股如老僧入定，唔多見到資金追捧，講到底，喺人仔貶值預期下，習慣借美元，享受「欠債縮水」的內地航空股，怕會有咁耐風流有咁耐折墮的下場。

過去半年，人仔貶值5%，遠期合約顯示仲有2至3%的貶值可能，以好的方面去看，最大果浸經已跌咗，大行計人仔兌美元每跌1%，三隻本地掛牌的內地航空股，匯兌損失大約等於一六年盈利5至7%。

的確，死數係咁計，但因為人仔過去幾年的強勢，對外航班需求增加的因素，明顯被忽視，好似南航（01055）首三季國內外航線分別有10%及30%的增幅。核心收益計一六年PE唔夠6倍，人仔如果貶值有序，相信目前估值已過分反映不利因素，東航（00670）亦有同樣情況。