近月市場上銀主盤有增加嘅趨勢，早前已經有業內人士預計明年底銀主盤會倍增，估計高逾百個。劉Sir最近就發現咗新增唔少銀主盤，部分更加係割價翻拍；將軍澳領都有一個2座銀主盤放售，實用面積約822方呎，叫價約莫765萬元，而上車盤屯門市廣場亦有一個低層銀主單位月底推拍，開價280萬元，較兩個月前劈咗40萬元。

最近市場新增不少銀主盤，部分更屬割價翻拍。（資料圖片）

屯門市廣場低層單位銀主盤將拍賣。

環亞拍賣拍賣師曾傑俊同劉Sir講，今個月底將會推出屯門市廣場8座低層G室銀主盤，實用面積約363方呎，開價280萬元，實用呎價7,713元，較市價340萬元低約17.6%。

西浦平兩成 領都嗌765萬

睇番上兩個月資料，原來依個單位喺十月期間已經以開價320萬元推出拍賣，但就賣唔出，今次就再低40萬元推出，減幅約莫係12.5%。

曾氏仲話，月底仲有其他銀主盤，包括鴨脷洲居屋漁安苑E座中層1室銀主盤，實用面積約504方呎，開價470萬元，實用呎價約9,325元，較市價低約14.5%。

另西營盤皇后大道西單幢住宅西浦高層D室銀主盤，實用面積約552方呎，開價1,100萬元，實用呎價19,927元，較市價1,350萬元低近兩成，而旺角豉油街90號鴻都大廈2座中層F室銀主半契樓，實用面積約318方呎，開價未定。

有消息話，將軍澳領都最新有一個2座高層銀主盤推出，實用面積約822方呎，叫價約莫765萬元，實用呎價約9,307元。

廖偉麟今年出貨套10億

另一方面，紀惠集團副主席廖偉麟同劉Sir講，話最近又沽咗上環信德中心招商局大廈33樓三個單位，面積共約4,217方呎，成交價共約8,200萬元，呎價約1.95萬元，較購入價高三成，佢仲話今個星期已經沽咗同層四個單位，套現約1.18億元，而今年就約莫沽咗10億元各類物業。

美聯旺舖王蕾就話，銅鑼灣信德街14至20號華英大廈地下及閣樓B2號舖，面積共約2,200方呎，連租約以4,800萬元放售。上址現由中菜餐廳租用，每月租金約10萬元，租約期至明年四月。