中國鋁業具值博率

近年愈來愈多美國超級富豪捐身家，微軟蓋茨及股神巴菲特算先行者。與東方社會家族財富承傳的思想好唔同，西方社會文化，送給成長子女的最大禮物是「獨立」，但這一想法，恐怕都幾難在親疏有別、親人利益優先於社會福祉的中國社會上萌芽。

雅士利難有突破

個市炒人仔「入籃」，彈完一日之後，尋日又一副牛牛皮皮格局，恒指收市升98點，報22,479點，成交791億元，SDR炒完，個市等住聯儲局主席耶倫講話，為月中美國首次升息作最後的觀察，以及歐央行今日的議息會，點應對再次擴大量寬的市場訴求。

雅士利（01230）向第二大股東達能收購嬰幼兒奶粉業務多美滋中國全部股權終於有細節，總代價1.5億歐元（約12.3億港元）。今次係雅士利九月份向蒙牛（02319）收購奶粉業務之後，第二次大型併購整合，連同本身雅士利及君樂富品牌，雅士利將成為內地奶粉品牌新一哥。

交易抵唔抵，真係見仁見智，因為一三年新西蘭恒天然事件，多美滋中國揩得都幾甘，去年底的淨資產負值10.51億元人民幣，無錯係「負資產」！一二年賺7.65億元人民幣，一三及一四年要蝕6.42億及7.71億元人民幣，在近兩年內地奶粉價格競爭加劇之下，亦難怪達能願意割愛。

雅士利啱啱出完盈警，今年業績要跌五成五，90億元市值賺億多元，睇估值無吸引力，關鍵係要幾耐先可以完成三方整合，並改善到盈利，但要有心理準備唔會一、兩年搞掂，全面放寬兩孩政策谷唔起，仲以為可以批股集資搞掂收購條數，依家2元樓下，感覺反而係短期比較難有突破機會。

中國指數研究院早兩日數據顯示，至十月底，52間房企成功發債，發行規模1,814億元人民幣，比舊年狂增16倍，人行放水，內地進入減息周期，私企債有價有市，史提芬覺得甚至可以用泡沫來形容，事關十月房企的5年期公司債平均發行利率只係4.16厘，按月跌一成二，仲要比同期限銀行貸款利率的4.9厘低。

睇到數字，難怪內房全股近排走勢咁標青，以前房企同銀行借錢，息口閒閒地都雙位數字，隨着中國進入低息期，資金流向國債及私企債券，房企利息成本低咗一大截，試想想12厘落到4厘，借100億一年慳咗8億利息，有利提升項目回報之外，內房股長期因為融資貴融資難而令估值存在超級大折讓，如今有機來個大幅修正。當然，客觀條件二三線城市庫存仲係大大鑊，揀內房股只宜睇番兩隻龍頭及一線尾股份。

江銅9元邊可吼

近兩日反彈市，史提芬先後猜中電力股和水泥股「反底」，下一個板塊則較難估。按理若市場對內地樓市看好，鋼鐵股應受惠，但仍未見有多大起色。江銅（00358）等內地10家銅企發起減產運動，惟江銅昨仍要下跌，市場對金屬類股份的悲觀情緒可見一斑。

中國有色金屬協會上星期亦要求政府調查惡意造空及購入稀有金屬「托價」，今次銅企更發起正式行動，但內地減產相對全球銅產量只是杯水車薪而已，實際幫助甚微。供應方面影響有限，主要仍看中國的需求，內地第四季已先後實施汽車購置稅優惠及北京家電補貼，惟國際銅價仍創6年新低。江銅股價在八、九月份均曾跌至9元邊緣，現在將要考驗是否能見「三底」支持，可以在該位短線一試博反彈。

鋁作為銅的替代品，亦受價格下跌所打擊，但中鋁（02600）近月均在2.5元附近徘徊，集團現正不斷出售資產，上月已與母公司進行一系列重組，早前售賣貴州鋁廠地予政府料賺10億元人民幣，另計劃出售物流業及氧化鋁附屬股權，料可再套現逾30億元人民幣，可望降低虧損；而電改方案包括容許直接購電，對其電解鋁業務有一定幫助。雖然金屬股今年肯定難捱，但中鋁因去年大幅虧損，改革力度和決心更大，相比之下，較具值博率。