周二大市急升後，昨日港股走勢飄忽，恒指開高90點，以22,471點開出，隨即倒跌見22,368點全日低位，未到十一點，指數又升穿開市價去到22,563點，以為破位，點知未到食晏指數再殺番落22,390點，對這類無定向風市況，衍生工具玩家即市唔好跟車太貼之外，亦切忌太重注令心理壓力增加。

昨日恒指埋單升98點，收22,479點，主板成交791億元，即月期指全日高低位22,576及22,362點，雖然高低波幅得214點，惟走勢蠱惑到極，十二月合約成交張數稍跌，去到11.5萬張，未平倉數字升至9.8萬。

老實講，對住極無方向的短期市況，應睇定先入市，大市連跌六日，反彈兩日，市場心態開始逐漸受兩星期後聯儲局議息的因素影響，淡靜後的閃升閃跌情況，對期指玩家比較不利。

恒指10日、20日及50日線收窄到百點之內，一副待變格局，周二尾市補回三分一注淡倉，帳面輸近百點，決定唔加注亦唔止蝕，一動不如一靜實行坐住先。