大市成交持續淡靜,昨恒指先高後低,有迹象大戶力壓期指以達成低位轉倉目標,今日終於捱到十一月結算,人民幣能否躋身SDR消息確認在即,後市係龍係蛇好快有答案。

偶發性挾淡情況,過去一個月已經歷三次,估唔到期指都一樣有傻盤,昨日開22,613點後,一分鐘搶到23,055點,十二月期指更見23,100點,近五百點波幅,不計價入盤一瞬即逝,好快回到22,730至22,860點上落區。搵番紀錄,23,000點樓上即月及下月共1,959套交易,嫌錢腥的傻盤唔少。午後曾跌穿開市價,三點後趨向淡靜,日市收22,525點,十二月期指收22,527點高水38點,成交6.1萬張。

大市未有脫離牛皮窄幅悶局,恒指收22,488點,10日、20日及50日線差距收窄到216點,指示作用不大,恒指波幅指數跌0.21至21.09,低成交悶局未改,開大開細均可,今日結算加埋最遲周一清楚人幣「入籃」結果,若今日未見突破,索性睇埋周一會否出現單邊升或跌市先入市追勢。