國際地緣局勢緊張，會唔會對下月美國聯儲局議息再添變數，不得而知，但睇昨日港股表現算是較預期冷靜，反正呢期唔多人持貨，要沽貨逃生的沽壓亦唔多，呢啲陰乾市真係攞命！

個別二、三線股逆市突圍，好似隻順昌集團（00650），早前宣布易主，並收購石油開發公司，股價復牌後急挫，惟近日又再回勇，不過波幅實在太大，都係行埋一邊睇人放紙鳶好過。至於電池股，理士國際（00842）股價急升兩成，但始終論基本因素呢隻股喺行業內屬次選，提防升浪短暫，跟炒只宜細細注。