Fundman睇市：中國動力炒落後

港股一副提早放假姿態，會唔會靜到聖誕兼過埋年？照睇機會應唔大。睇返短期影響股市發展的消息實在唔少，下周一前，人民幣納入特別提款權（SDR）將有分曉，跟住A股重啟IPO，初期熱到爆幾可肯定，跟住十二月中輪到美國聯儲局議息，十年來首加的機會已是高唱入雲，之後聯儲局點演繹一六年的加息步伐，對美股後向舉足輕重。

橫睇掂睇，十二月金融市場都唔似會靜，過去一個月港股三次出其不意挾淡，且一眾衍生工具引伸波幅低企，十足十暴風雨前夕，大戶搵散仔祭旗格局。與其唔知佢開邊瓣，倒不如等個市出現明顯突破，跌穿22,000點或上破22,800點，確認方向至追。

重啟IPO勢熱爆

當然在下認為十二月炒上較隊落去機會大，如果純睇阿爺手影，無疑是信心十足一樣，重啟IPO之外，券商準買唔準沽限制都撤銷，A股的中期低位似乎已得到官方確認，無形手之從暴力救市中退場。睇番重啟IPO，鍾情抽獎的大媽唔單止齊聲讚好，首批廿八隻新股之後，內地新股引入新玩法，可確認獲配數目先科水，新股客唔使再沽貨籌旗參加大抽獎，咁做對二手市場影響固然減到最低，講到底係形同阿爺鼓勵篤手指，新股重開好大機會熱到爆炸，大媽又有機會再癲過，唔多唔少對香港尤其係被稱為港A股的，帶來刺激作用。

綠地香港（00337）同奇虎360集團合作，拓展互聯網金融服務，前者早市炒過上3.52元創一個月新高，後尾升少咗，收3.41元，升0.2元。半年前提過，綠地阿媽綠地集團同阿里巴巴旗下螞蟻金服，一向有合作網上金融產品銷售，且做得唔錯，綠地一直期望轉型，最終把互聯網金融服務平台與地產生意剝離。

今次合作，綠地成為奇虎360旗下「你財富」平台（nicaifu.com）的認可發行人，現時內地經濟增長失速，人行連環雙降，人民幣進入減息周期，這類一般提供每年5至6%年度化收益率的金融產品，在內地散戶圈子需求不絕。

A股爆煲前，綠地攻網上金融的故事，氹到唔少大孖沙落疊，五月成功以每股7.46元配售2.28億股，籌逾16億元，跟住個市發生乜事大家都知，綠地批股唔夠兩個月插到見2.97元，接貨最多揩六成，唔少中資基金重創，要錢唔要貨，掟到亂晒章法。

綠地現價博得過

綠地都唔係批完關仁，七月初至今公司廿四次回購股份，仲唔係大大聲細細注嗰隻，十月最大一撼貨達650萬股，九月亦見試過大手掃回818萬股。以往回購消息點都對股價有支持，但綠地回購卻愈買愈低，由七月最貴試過5.4元，之後買到落3元邊。

點都好，尋日消息炒上嚟，3.41元仲係比近月回購的平均價低，現水平風險應該唔大，半年前綠地都係大媽港A股名單之內，企穩3.3元樓上，不妨吼實。

昨日表現最突出板塊屬電池股無疑，未知是否與天能動力（00819）擬分拆電池子公司於新三板上市有關，電池股揚威主要是叨電動車的光，昨亦有國際電動車展覽在香港博覽館舉行，比亞迪（01211）、五龍（00729）及中國動力（00476）等均有電動車亮相，但股價未見跟升。值得注意的是，天能和超威（00951）現時主業仍是鉛酸電池，前兩年割價鬥個你死我活，今年才回復增長，而電動車電池和鋰電池屬新興業務，股價飛升主要是憧憬成為未來增長動力。

電動車的核心技術在電池，現時各車廠均在研發電動車，對電池的需求可望快速增長，不過天能三個月升兩倍相當嚇人，光宇（01043）近期亦連升八日，即使電動車前景多好，要高追也實在要冒太大風險。低吸的話可留意中國動力，剛公布中期虧損擴大，但主要是現時仍屬投資期，其「香港品牌」電動巴士將於下季試行，若運作理想，有望取得香港巴士公司的訂單。