港鐵（00066）將軍澳日出康城第九期住宅項目尋日正式招標，之不過最近市況麻麻哋，所以補地價都有走下坡嘅趨勢。劉Sir收到風，今次項目補地價金額約莫28.52億元，比起市場嘅預期為低，每方呎補價大約2,545元，相比第八期更加低出咗超過一成，而區內擁地嘅新地（00016）就率先表態會入標競投。

將軍澳日出康城第九期（箭嘴示）昨日招標，住宅樓面逾112萬方呎，可建住宅單位數目最多1780伙。（資料圖片）

萊坊林浩文估計，項目總投資額約65至75億元。（資料圖片）

張翹楚稱，每方呎補價較低與景觀有關。（資料圖片）

港鐵公布，尋日開始正式邀請發展商提交日出康城第九期嘅標書，下月二十八日截標。

劉Sir八到，項目嘅補地價金額約28.52億元，即每方呎約2,545元，相比起月前批出嘅第八期每方呎補價約2,830元，出現咗超過一成跌幅，不過都仲係日出康城純住宅項目嘅次高。

至於其他條款就大致同對上一期無異，其中分紅比例最少15%，項目不設前期工程費，另外，發展商要額外出價競投，即係分紅比例同埋額外出價係中標嘅勝敗關鍵，項目須於二○二二年三月底前落成，而發展商負責興建嘅幼稚園就要交還政府。

長實會地出手機會大

劉Sir知道，區內持有項目嘅新地已經表態會參與競投，集團副董事總經理雷霆同劉Sir講，今次補地價水平合理，集團計劃入標。至於長實地產（01113）同埋會德豐地產呢啲區內擁地財團，都相信幾有機會出手競投。

產業測量師張翹楚就咁睇，今次每方呎補價較對上一期低，相信同項目嘅景觀問題有關，因為唔係全數單位都有海景，近排市況回落，但就覺得同補價低咗未必係直接關係。萊坊林浩文就話，項目落成後嘅生活配套完善，將來提供中型單位為主，估計總投資額約莫65億至75億元。

二手市呆 慧安園平10%

將軍澳二手最近交投緩慢，只有零星低價個案，老友利嘉閣劉浩勤就話，區內慧安園3座中層A室，減價40萬以420萬元售出，實用呎價10,169元，比起市價470萬元足足低咗約10.6%。

此外，中原測量師行今日拍賣北角七姊妹道187至193號遠東大廈85%業權、同埋七姊妹道/健康東街中原大廈72.5%業權，開價6.5億至6.6億元。