美國零售數據麻麻，聯儲局加息預期進一步降溫，利率期貨顯示機率由一個月前的40%落到25%，即係只得四分一機會加息。聯儲局由前主席伯南克到今日的耶倫，都有順着金融市場預期，不為華爾街添煩添亂的習慣，因此斷估九月都係加唔成息。加上在美元強勢、中國加入貨幣戰爭、難民問題威脅歐洲經濟復甦，舉步為艱的大環境下，在下繼續相信，一五年美國都好難加息。

市傳中央重組電訊業計劃內，聯通將跟中電信合併。（資料圖片）

太陽日誌

前晚美股搶先在議息前爆升，道指急升超過200點。至於守住10日線，又被20日線頂到冚的港股，尋日亦趁機會殺淡友一個措手不及，升511點，收21,967點，國指升200點，收9,904點，成交增至833億元。昨日港股尾段愈升愈有，要多得跌穿三千點後拗腰急抽的A股，在最後一小時交易，滬綜指從低位反彈近6%，最後收報3,152點，創下近三星期最大單日升幅。

基金避險揸茄薯

月初中交所三道金牌，限制股指期貨開新倉兼加重孖展後，滬深三百期貨成交已比早兩個月高峰期勁縮九成九，得萬七張，尋日升市斷估同期指挾淡無關，至於政府有冇入市托價，作為局外人亦唔會知，但睇落似技術反彈居多。

在中、美、歐各自有政治、經濟問題困擾底下，投行最新的基金經理調查顯示，市場避險情緒頗高漲，九月股票基金現金比例升至5.5%，是○八年以來最高，對沖基金的淨倉比例，亦見一二年六月以來最低，可見「不明朗揸現金」的股市大道理，正影響大部分基金經理對短期投資的睇法。其實即使不看調查，從國企成分股估值跌到7倍多，回到○九年低位，多少體現大孖沙對後市的想法如何。

事實上，中國粗暴救市搞到唔湯唔水，人行口裏說人民幣貶值只屬一次過，但已經愈來愈多分析認為，中國需要讓貨幣持續貶值以刺激經濟，這個比國企盈利增長放緩更為趕客，話7倍市盈率抵，但可能有人認為要見5倍先至有興趣。

本周初的國企改革消息，股市反應猶如泥牛入海，恐怕連最後一批高唱中國明天會更好的死硬派，都要灰心失望，股市是否已經見底？好難講，但見壞消息殺傷力驚人，好消息被當透明，又確實似見底、或快將見底的徵兆也。

講番國企改革，引進民間資本，管理及員工提供激勵機制，提升國企在國內外的競爭力，聽落當然好聽，股民亦早就耳熟能詳，但做唔做到，最終要睇阿爺係咪真係學到淡馬錫模式，可以徹底放權，日後唔管企業經營決策，專注資產整合及資本運作。而傳得最勁會係先頭部隊的電訊業，幾乎每隔一段時間，都聽到有賓架老友言之鑿鑿，話聯通（00762）同中電信（00728）會進行合併。

短期不乏催化劑

回顧四、五月股市仲係火熱期間，一來見電訊股拉牛上樹，其次內地基金大炒特炒「港A股」，當然無將兩間電訊公司合併消息放在眼內，國企改革《意見》正式曝光，而三大電訊商八月又來個高層大挪移，中移（00941）董事長奚國華退休，由工信部副部長尚冰接任，中電信董事長王曉初轉任聯通董事長，而聯通董事長常小兵又交換過檔中電信。

儘管八月時，王曉初暗示合併是十畫未有一撇，但看來電訊業二哥、三哥結盟，與大佬分庭抗禮，還是未來的大勢所趨。

與四月初高位15.7元比較，聯通累積調整34%，中電信由5.68元返到現價4.07元，跌28%，不約而同，兩股都已回到去年滬港通通車前水平，市帳率不足1倍，一六年市盈率分別為14.7倍及12.6倍，較十年平均估值低41%及15%。

中長線而言，在一個買咗唔死得人的低位，未來三至六個月，三大電訊商完成向鐵塔公司注資，作上市前工作，而聯通及中電信有可能響應國家隊呼籲提高派息，都有機會對股價起正面刺激作用，有閒錢又無心水的，兩隻電訊股中短線都有可取之道。