本港吹起「樓市轉角」風，但地皮做價仍創新高，內地房企繼續高價搶地，屯門青山灣段臨海住宅地皮由保利置業（00119）以17.3億元投得，平均每方呎樓面地價高達15,095元，貴絕新界西北區，今次係該集團繼投得啟德新發展區地皮後，再次高價投地。市場人士預料，該地落成後洋房呎價可高達3.5萬元。

屯門青山灣段住宅地皮前身為歌頓軍營。（資料圖片）

浪濤灣有業主大幅反價再放售單位。

屯門青山灣住宅地資料

呢塊青山公路近舊咖啡灣地皮，前身係歌頓軍營嘅臨海地，地政總署尋日公布，以17.3億批畀保利置業，計番每方呎「麵粉」價成15,095元。

投資30億 走高端路線

呢個價打破咗上個月由元朗牛潭尾地皮所創，每方呎樓面地價12,189元舊紀錄，成為新界西北區呎價地王，亦都較市場預期上限的13.75億元，高出約26%。

呢幅新界西北區呎價地王，地盤面積約88,159方呎，最高可建樓面面積114,606方呎。今次亦都係繼七月份萬科置業（香港）拎到掃管笏路屯門做價地王之後，兩個月內再有內房企拎到區內地王級項目。

保利置業負責人就話，塊地有海景，出價前已經做咗仔細研究，初步諗住起分層住宅同別墅混合式發展，預計投資額超過30億，走高端路線。另公司亦都會繼續留意其他合適嘅發展項目。

講番保利本身，喺香港買地可以話唔貴唔買。上年兩月首次成功買地，嗰幅東九龍啟德1I區3號地盤，又係有靚海景，當時以每方呎樓面地價6,530元投得，成為全區最貴呎價地皮，紀錄依家都未打破。

其實發展商入標反應，已經反映咗呢幅地嘅吸引力。塊地上星期五截標，就吸引咗多達20組發展商入標爭，除咗保利同萬科之外，亦包括多間本地薑，例如長實（01113）、新地（00016）、信置（00083）等等。

浪濤灣洋房加價400萬

劉sir老友，戴德梁行大中華區執行董事及評值諮詢部主管張翹楚就估計，塊地日後落成之後，洋房隨時可以賣到3.2萬至3.5萬元一方呎。

區內業主一聽到又有地王誕生，即刻引來封盤反價潮。美聯吳鵬雄爆料畀劉sir聽，附近嘅浪濤灣一個臨海雙號屋，即刻由5,600萬反價到6,000萬再放。星堤一個A街單號洋房，就由3,000萬加到3,200萬。至於愛琴海岸，一個5座高層C室3房海景單位，叫價亦都由650萬加到700萬。