終於等到人行出手「雙降」，可惜刺激作用不大，滬綜指昨日先插穿2,900點，午後再抽高至3,092點，收市失守3,000點關。霸氣沒有了，惟有腳踏實地，反覆尋找支持位。

中美股市齊齊玩過山車，港股冇好日子過，恒指反反覆覆，短炒指數輪證隨時左一巴右一巴，吓吓唔賭唔知自己時來運到的心態，必要付出代價。昨日國企指數微升，九月三日閱兵愈來愈近，軍工股似乎又想借勢翻炒一轉，中航工業（00232）、航天萬源（01185）、中國飛機租賃（01848）、航天控股（00031）升3至9%不等。不過真係炒閱兵的話，頂多炒得幾日貨仔，加上樓上層層蟹貨，唔玩都唔會有咩大損失，有貨就最好把握逃生機會。

中期業績遜預期

睇吓業績股，中糧控股（00606）宣布中期業績，雖然半年收入同比減少12%至392億元，但經營虧損大降98%至690萬元。期內，油籽加工業務經營虧損由去年同期的逾十億元，收窄至2.77億元，大米加工及貿易業務虧轉盈，錄得經營溢利2,400萬元，但令人失望的是生化及生物燃料業務，經營溢利僅1.79億元，較去年同期的4.16億元大減，難怪本來預計有機會轉虧為盈，結果出來半年仍蝕2.69億元，同比收窄7%。

生化及生物燃料業務經營溢利表現遜預期，主要是受低油價之累，乙醇價格明顯下降，一定程度延緩了公司轉盈的步伐。七月以來油價繼續尋底，看來公司下半年整體業績仍受挑戰，股價要打個折，故見近日跌市股價都跟跌落番3元邊。不過，若然呢浪去年舊年末季低位2.7元水平，其實中長線都有得諗。暫時且先觀察低位承接再作決定。