大市成交進一步萎縮,昨日主板得1,266億元,創四月初港股大爆升以來新低,高位長方形膠着市況,似乎仲未去到盡頭,就連期指市場都極為淡靜,高低位27,300及27,106點,上下波幅不到兩百點,成交僅4.3萬張,都是四月初大升市以來鮮有出現的悶市。

股權追蹤

恒指MACD呈現熊叉多日,9日RSI回落至43.6,技術上四月呈超買,經歷持續高位橫行已經完全消化,甚至可以話上升動力明顯減弱甚至轉淡。事實上,昨日是過去十二個交易日以來,恒指日線圖上出現第十一支陰燭,大戶即市逢高減磅的手影處處。昨日的升市,要多得騰訊(00700)亮麗季績,貢獻指數近75點,否則恒指可能是人行減息後第三日跌市。

本文一直不主張高位反手,主要考慮港股獨弱,與A股強勢呈背馳情況,萬一恒指、國指爆升一兩日,可能偷雞唔到蝕把米,故情願等指數終極一回,好倉冚旗投降至入市撈底,可惜這一日遲遲未出現,惟有睇恒指會唔會落到上升裂口頂部26,732點後強力反彈。