Fundman睇市：晨訊勝在估值平

恒指破兩萬五重要心理關口之後，在27,000至28,500點高位悶局輾轉拖了超過一個月，交投愈玩愈縮，反映要買的買齊，新錢又唔多願在現水平加注。事實上，人行準已降，息已減，預期連環放水做咗，股民除了等港股自願地追補A股升幅，就只能落番去基本面，睇連串的刺激經濟措施，效力幾時在內地各行各業身上慢慢浮現出來。

息口敏感的內房仍較可取，去年十一月人行三次減息以來，現時內地五年期以上按揭利率落到5.65厘的超過十五年新低。睇番今次減息前，四月份一、二線城市樓價回升，全國百大城市綜合樓價平均跌幅收窄到0.14%，短期拐點應該出現。

內房股仍然可取

減息加埋樓價掉頭，可以刺激一些猶豫未決的買家入市，令五、六月內地樓市溫度進一步上升，不妨把握近期高位回落，等機會再入貨，個人睇中高位回得唔少的世房（00813）、富力（02777），以至炒味較濃的恒大（03333）都可以考慮。

國際調查機構IDC日前報告中提到，內地手機市場六年來首度走疲，首季出貨量1.1億部，按年跌3.7%，其中智能手機跌2.5%。經歷連續多年超高增長後，智能手機市場開始出現飽和。

中國3G、4G用戶未夠1.9億，即使仲升緊，但係咪好似港人咁一年換兩次機，一年可以消耗4、5億部出街新機，這點值得諗諗。內地手機出貨量放緩是意料中事，以首四個月1.54億部累計出貨量，同一四年全年4.52億部比較，三分一年時間，完成一四年全年34%左右的出貨量，可見今年數據唔算標青。減價戰開始形成，早排手機設備股股價炒晒上去，反而是筆者有點跌眼鏡，好似隻酷派（02369）咁環境仲可以由1.3元炒上3.2元，惟有同走雞的看官們講聲sorry。

4G手機加速普及

工信部數據有一點值得參考，內地發4G牌後，生產商全速由2G、3G轉到4G戰線，每百部出廠手機，已經有83部屬4G機種。參考香港由56K上網到今日100M，都居然有人話唔夠快的歷史，在高速兼容的4G趨向普及，中國三大流動網絡商，遲早有加價條件，長遠依然值得睇好。

近排雙馬四圍濕平，阿里巴巴入股美國在線零售商Zulily Inc.，轉頭又話騰訊準備收購美國手游公司Pocket Gems Inc.。此舉令到唔少中小型科網公司估值亦假當真咁炒到鬼咁貴，尋日加埋總理李克強主持國務院常務會議，提出加快高速寬帶網絡建設，全力配合「互聯網+」國策，科網股炒風火上加油。

但如昨日所指，早一個星期阿里及京東（JD）在美國出季績後，大隻科網股好似金山（03888）、網龍（00777）累積升咗唔少，尋日已經有反高潮情況。不過，資金有分流向其他二三線科網股身上的迹象，例如晨訊（02000）、金蝶（00268），一炒就分別升20.7%及6.1%。

查實依家屬一線、市值大、基金有貨的科網股，普遍都幾貴，可惜二三線基本因素又較次。好似晨訊本身無乜新故仔，一一年後業績蝕足三年，一四年度啱啱虧轉盈，市帳率夠晒平，去年得0.85倍。雖然講明係高風險，但依家個市又點阻大家去衝浪？一於訂0.58元止蝕，跟一跟大隊。

贏28%

Sammi於本月八日推介怡益控股（01372），股價當日低見3.5元，昨在賣盤消息刺激下曾突破4元關，高低位計累升逾28%。