內地A股一彈又散，尋日再跌1.6%，收4,229點，話咁快由上周海嘯後高位回吐7.5%之多。中央一心想托市救經濟，藉股票市場解決今年內地面對的融資緊張困難，同時製造財富效應推動內需經濟，不過要A股由瘋牛變慢牛，唔係講咁易，尤其一向羊群心態作祟，A股大媽顯然唔受呢一套。

一帶一路推動基建需求，海螺可望從中得益。(資料圖片)

太陽日誌

綜合大行預測海螺業績

依家客觀事實，近期A股大量IPO應市，估計吸走2萬至2.5萬億人仔，同一時間，多間券商響應中證監呼籲又好、為自身風險着想又好，見個市癲得滯，都紛紛收緊孖展比例，部分更把創板股及炒得勁的細價股拒諸門外。

睇番滬股成交由個多星期前持續貼近萬億人仔，到過去幾日得七千多億左右，入市新錢明顯減少，滬綜指連穿10日及20日線，亦是三月以來首次，似乎短期要抖抖氣機會相當大。

以A股馬首是瞻的香港魚缸，在A股腳軟下，也都一幅有心無力的姿態，昨恒指即市一度收復兩萬八關，午後在A股拖累下，收市倒跌115點，報27,641點，整體下跌股份達過千隻，可見周一癲到144隻股仔升幅超過一成，純粹係上帝要你滅亡，必先要你瘋狂的陷阱。

內房候低執平貨

炒得勁，回得快最啱形容內房股，連日狂升的恒大（03333）跌5.1%，收7.43元，不過睇番一個月之間，恒大仲累積九成一升幅，昨日調整幅度只係濕濕碎，其他回得比較多的內房股仲有合景泰富（01813）跌4.8%，中海（00688）跌4%，碧桂園（02007）跌3.5%，雅居樂（03383）跌3.1%。

內地今年首季GDP升得7%，創六年新低，勉強守住中央全年增長目標，但對比一四年的7.4%，經濟增長失速情況未止，加埋近期出口及PMI數據之差，形成股市對人行進一步減息降準，甚至推中國版的量化寬鬆的預期，不斷升溫。

睇形勢，中央行返○九年舊路，瘋狂放水大興土木支撐經濟的可能性，唔可以完全抹殺，而谷高股市樓市，亦係無辦法之下的必然對策，何況對比○九年時，依家內房股估值一啲都唔算貴，若然回得再深啲，不妨諗吓再上車。

水泥股今浪起步遲，升幅唔多，以龍頭海螺水泥（00914）為例，三月中由26元起步，升至最高34.15元，昨收31.15元，輾轉由高位回落8.7%，較起步位升幅唔夠兩成。

海螺首季業績麻麻，營業額倒退11%，是近九年來首次，實現利潤倒退30.7%，主要受內地發展商較低的建屋需求，使水泥銷售及價格均見疲弱有關。隨着內地樓市調控措施撤銷，態度由壓到托，人行向銀行指引加快按揭貸款審批，部分銀行也開始給予首套房置業者息率優惠，四月樓市已見小陽春反彈，有利建設需求止跌回穩，預料水泥價首季觸底，第二季平穩，下半年回升機會甚高。

具一帶一路概念

再宏觀一點，國家的一帶一路發展戰略，更多的基建項目啟動推動需求之外，海螺的國際化發展計劃，例如在建的印尼及緬甸廠房也可從中得益，而中國籌組亞投行，三月底始創成員申請截止前反應熱烈，反映區內投入基建資金的興趣。

現價海螺市帳率1.93倍，貼近○八年至今介乎1.56至4.5倍的下限，業績下半年能否收復失地都好，首季見底機會相當高，一五年預測市盈率11.7倍，只及歷史平均18倍的三分之二左右，對比不少炒供求或追逐AH差價的國企，海螺基本因素明顯較佳，趁市況整固，假如回試30元樓下，甚至50日線29元附近，吸引力更大。

贏29%

阿莊於四月二十九日推介勝利管道（01080），指該股隨時有突破，其後果然反覆向好，昨逆市呈強，以高低位計，累升29%。