起動九龍東令到呢區嘅前景看俏，區內嘅居屋同車位市場就繼續起哄。啱啱鑽石山龍蟠苑有兩房單位以實用呎價12,559元轉售，而牛池灣單幢居屋彩峰苑亦有高層戶以694萬元成交，兩個價分別創咗兩屋苑新高。而牛池灣峻弦剛有車位以218萬元賣出，料創東九龍車位價新高。

東九龍物業受追捧，其中鑽石山龍蟠苑有兩房單位獲買家高價承接。（資料圖片）

東九龍物業市場高價成交

牛池灣峻弦一雙號車位售218萬元。

富誠地產陳錫金同劉Sir講，龍蟠苑啱啱賣出嘅A座高層11室，實用面積426方呎，屬單邊享小海景單位，自由市場成交價535萬元，創同類新高，實用呎價約12,559元，估計係屋苑新高，而個單位約四年升值59%。

彩峰苑自由價694萬

陳氏又話，牛池灣單幢居屋彩峰苑有個高層9室，實用面積634方呎，近日以自由市場價694萬元賣出，亦創屋苑新高，實用呎價10,946元。該行另稱，鑽石山居屋鳳禮苑A座中層7室以綠表價378萬元售出，實用呎價6,762元。消息稱，青衣居屋青華苑B座高層5室以自由市場330萬元售出，實用呎價9,763元創新高。

至於東九龍的車位亦受追捧。資料顯示，峻弦一個雙號車位最近以218萬元賣出，原業主一一年以約100萬元買入，依家帳面賺118萬元。估計今次售價創咗東九龍新高。

車位市況轉旺，家天下黎振傑話，旺角居屋富榮花園四月至今已經錄到6至7宗車位買賣，唔少仲係短炒個案，好似5樓單號車位上月以98萬元賣出，約兩個月帳面已賺13萬元。

最近多個二線屋苑，都錄到高價成交。中原酈雅倫話，屯門大興花園呎價逐步向萬元逼近，啱啱1期有3座連天台單位，實用面積428方呎，以412萬元賣出，實用呎價9,626元創咗屋苑新高。

健威隔日賣貴16萬

該公司林龍南又話，北角健威花園最近連錄兩宗買賣，其中有個F座低層4室賣咗542萬元，僅相隔一日，做價比另一個同層單位賣貴16萬元。

美聯麥列東話，葵涌寶星中心出現兩日兩破頂，屋苑日前有個A座單位以實用呎價約11,305元創屋苑紀錄賣出，紀錄保持一日就畀B座高層7室打破，呢個單位成交價350萬元，以實用面積約308方呎計，實用呎價11,364元，呎價再創新高。