二月美國零售數據意外地出現倒退，遜於預期，數據一出，啱啱掂到十二年新高的美匯指數升勢即見收斂。原本華爾街一面倒估聯儲局本周會立即修改耐心等候的字眼，投資者驚加息驚得要命，依家或者有數講。

已躋身個人電腦一哥的聯想，中長線前景仍未宜看淡。（資料圖片）

太陽日誌

聯想的業績預測（美元）

上周四道指已經立即炒返轉頭，狂升259點，可惜叻唔夠一日，上周五美股再散過，三月密歇根大學消費信心指數跌至91.2，遜於市場估計的95.5，是去年十一月以來最低，市場認為主要受北美嚴寒天氣影響，市民對外出消費欲減低所致。

不過，睇大環境，三次QE，二月美國失業率回到5.5%，是金融海嘯爆發以來後新低，亦足足比前聯儲局主席伯南克，定出去到6.5%最後無執行的退市指標低一個百分點。過去大半年，國際油價大瀉，汽油及天然氣等主要開支減少，照道理美國可支配收入增加，無理由消費開支裹足不前，若唔係聯儲局半年內退市共識，加埋美元突轉強，民眾對經濟放緩預期作怪，除此之外，搵唔到其他理由解釋點解美國個個勒住荷包做人。

上周五道指及標普指數分別跌145點及12點，計落一五年至今，兩個指數都經已倒跌。今個星期聯儲局點處理市場對息口預期，又唔引起金融市場動盪，耶倫上任咁耐，今次都應該係考牌之作。

基金經理睇唔通

近排港股表現之差，相信令唔少人大跌眼鏡，尤其人行在春節假期一完，出其不意宣布三個月內第二次減息，港股反高潮，高開後低走，之後仲連跌七日，上周四、五終有有反彈，但兩日加埋僅升104點，成交仲要愈玩愈縮，基金經理都擺出一副睇唔通，不如少做少錯的姿態。

上周地方債務問題終於有所進展，國務院批准地方債置換，規模1萬億元人仔，規模大約等於一五年到期政地方政府債券規模的五成四。自從內地樓市吹起冷風，依賴賣地收入的地方政府面臨財政緊絀問題，通過債券置換借新還舊，高息換低息，確實可以為地方政府財政爭取一啲時間，減低償債壓力。

對於內銀而言，措施有辣有唔辣，好處當然係減低手上債券違約，變成不良貸款的風險，但同一時間，高息置換低息新債，對利息收入不利。姑勿論如何，內銀股股價正面的回饋，可見投資者目前對內地經濟硬着陸，銀行壞帳飆升的憂慮，是高於對息差收窄的擔心。

業績繫收購成效

中國個人電腦（PC）一哥聯想集團（00992），真係屋漏兼逢連夜雨，主席減持外，上星期IDC調低今年全球電腦出貨量預測，聯想慘遭空軍狂轟，過去一星期股價跌超過一成，收報10.94元。

PC乃明日黃花並唔係秘密，早排IDC對今年平板電腦出貨量，增長同過去幾年比較都大幅放緩，聯想的智能移動設備項目包括智能電話，今年受到其他內地生產商大升的出貨量，面對價格競爭會更大，而早於兩三年前見頂的PC出貨量，純綷是淡友搵藉口，基本因素，兩宗收購，即IBM伺服器及摩托羅拉的後續表現，對未來業績好壞先至係關鍵。

上周五，聯想沽空去到4,097萬股，佔成交四成九之多，淡友做緊乜，已是畫公仔畫出腸，睇淡者死心不息做佢世界。

唔知大家有冇留意，呢隻基金股成日都係好淡對決戰場，一月底、二月初試過連日高沽空後，只係藉普普通通的第三季業績，挾過一輪空倉，淡友由10元補到氣咳，股價上番12元。筆者先利申，中長線對聯想都有保留，俗語話爛船都有三斤釘，更何況已經躋身PC界一哥的聯想，如果沽空比持續高企並隊到落10.5元或更低，小心又會嚟一次挾淡。