已經發展到美股升港股唔升，A股升港股一樣唔升的地步，港股投資者實在無辦法唔愈炒愈頹。美股升港股無反應，是因為美股近期每次上升，都是非常集中，迪士尼、大銀行又或者蘋果公司升，對港股大盤根本無拉動作用。

至於A股市場擺明是閂埋門一家親格局，內地投資者打骰，喜歡點開就點開，AH差價再次拉闊，說明了外資完全不認同，所以A股勁勢幫助有限，亦難怪基金經理頗多反對A股加入MSCI。

上周尾段應升唔升，便要小心反過來會跌勢加速，這個星期幾家大藍籌出業績，加上聯儲局會議聲明，隨時風起雲湧。星期五又到美股結算，過往經驗市場波幅在這段時間是會增加，配合上述連串事件，有望打破悶戰狀況。

低成本以小博大

最近港股雖然是跌，卻是陰乾走勢，反反覆覆，跌得甚慢，買貼價Put尚且有得贏，買價外Put只是得個吉。不過，現在應該改變策略買行使價較遠的價外Put，例如恒指23,000Put，付出較低成本以小博大。

其實在最近兩三個交易日，港股期權時間值的消耗開始止跌，和大盤回穩走勢不符，反映出市場是外弛內張，加強防風措施。

自己對港股雖然中長線放棄，但在目前水位睇得太淡是有戒心，始終是一個長期上落市，短期走勢更差也好，在大支持區域低位睇淡是危險，故用價外Put投機是最合適，即使不中也無傷大雅，回報則有機會喜出望外。當然如港股不跌反升，有一次較強勁的技術性反彈的話，便應趁機會減持。