尋日野馬國際（00928）出現異動，即市一度抽升15.7%至2.72元，好近七月的一年高位2.92元，雖然炒味夠濃，但係波動太大，好似上月股價碌到落低位1.15元，近年股份合完又拆，真係幾蝦人玩！所以只宜小注跟炒，阻力睇2.75元，支持位2.25元。

野馬自四月起已關閉內地35家門店及零售門店其中30家，並在「淘寶」同「京東商城」開發網上購物平台，截至九月底止，擁有5家位於北京、西安及深圳的零售門店。公司上半年收入倒退53.1%至465萬元，虧損縮至2,772萬元，去年同期則蝕9,400萬元，原因係佢移除已終止業務相關虧損3,370萬元，同埋服裝業務轉做電子商貿，令行政、銷售及其他經營開支減少。雖然中績虧損收窄，不過毛利率由92.3%降至2.75%，事關服裝業務大搞促銷，而且關閉門店影響收入，可見暫時仍然面對過渡性影響。

繼十一月完成收購中國教育傳媒及其附屬北京新知堂後，公司啱啱公布可能收購一間網絡媒體平台發展及有關科技公司的股權，若然成事，收入來源有望進一步改善。