超級豪宅年尾走勢轉差，上個禮拜再度出現流標嘅太古地產（01972）山頂區司徒拔道傲璇，昨日公布轉為公開形式發售。依新例公布所有未賣共8個單位價單，不過暫時安排今個禮拜五賣嘅，都係3個早排流標嘅2、6樓同埋地下複式B單位，全部單位都面對現實減價，較招標指引價減3.75至4.9%，今次以6樓減得最勁，售價3.9億元，減咗2,000萬元。

傲璇單位昨公布轉為公開發售。（資料圖片）

除了超級豪宅交投轉差，二手豪宅亦錄蝕讓。

傲璇公開發售資料

劉Sir發現，今次傲璇公布嘅價單合共有8個單位，分別係2、3、5、6、7、12樓，同埋地下複式A及B單位，售價由3.85億至5.2億元，呎價74,815元至100,231元，當中地下複式A單位呎價超過10萬元最高。

不過，根據銷售安排，傲璇今次只係先推出啱啱上個禮拜流標嘅2、6樓同埋複式B單位，所有單位售價都減咗價。

其中，曾兩度流標嘅六樓單位，實用面積5,199方呎，售價3.9億元，較上次指引價4.1億元下調咗成4.9%，呎價75,014元，係最大減幅單位。

呎價最低逾七萬四

其實呢個六樓單位最初開價4億元，之後加完價又再減價招標。

另外，同樣兩度流標嘅複式B單位，亦由上次5億元的指引價，減價4%至4.8億元，該單位實用面積4,819方呎，呎價99,606元。

至於只係第二次推出嘅二樓單位，售價由上次指引價4億元減價3.75%至3.85億元，實用面積5,146方呎，呎價74,815元，亦都係價單內售價同呎價最低嘅單位。

樂天峯4400萬蝕錢走

二手豪宅亦有唔少蝕讓個案，市場人士話，跑馬地樂天峯一個實用面積約1,281方呎A室，以約4,400萬元賣咗，實用呎價約3.43萬元，依家做價較購入價低。

中原龍智峰話，元朗加州系洋房今個月暫錄約4宗成交，其中柳樹徑雙號屋，實用面積1,198方呎，以952萬元賣咗，實用呎價7,947元，單位一○年至今只係升值約12%。