今年世盃完咗之後，華彩控股（01371）的股價同交投「價量齊跌」，而且波幅逐漸收窄，連暴炒妹都唔係好記得佢，直到近日隻股先至沿住10日線上升，尋日仲要踩油升逾一成，大幅拋離保力加通道頂部0.72元樓上，以接近全日高位0.8元收市，配合大成交兼10日線升穿多條平均線，不妨喺8毫子樓下跟進，阻力先睇9毫子，支持7毫子。

華彩從事提供彩票系統、終端設備、遊戲產品，以及市場運營的技術及服務，包括視頻彩票、電腦票及基諾型彩票，以及新媒體彩票等。睇番成績表，公司中期營業額增長34.8%至4.6億元，純利增長35.2%至5,487萬元，其中視頻彩票「中福在線/VLT」銷量創新高，而福彩電腦票在廣東銷量排第一位、重慶銷量排第十五位，另八月亦中標上海福利彩票新銷售與管理系統技術服務項目。

至於體彩電腦票，已先後在兩省兩度中標終端機採購項目，依家終端機業務覆蓋貴州省、甘肅省、浙江省、安徽省同廣西壯族自治區。去年以來，華彩向區域深耕戰略目標推進，除品牌優勢得以提高外，亦都帶動業績穩步增長。