隔晚美股急挫，但長假期後復市的A股，不單無追補外圍跌幅，還有0.8%升幅，再創滬港通宣布後新高，但無阻連彈三日的港股玩家，趁機沽貨鎖定利潤。

恒指期貨走勢

昨指數早市低開201點後，整個上午其實變動唔大，在23,187至23,301點百餘點內上落。在沽壓有限，加上即市波幅較過去幾日明顯收窄下，好友加多兩錢肉緊，趁三點A股收市後，恒指一度在滙控（00005）帶領下反撲，即市見過23,369點，惟收市前反彈幅度又再收窄，恒指埋單跌159點，收23,263點。

即月期指日市收23,226點，較合理值低4點，成交5.1萬張，全日加權平均成交價在23,202點，密集區則介乎23,175至23,200點，日市收於其上，技術上已唔算太差，主板成交進一步縮至651億元，多少見到恒指反彈後，基金追勢興趣唔大。

周二，恒指反彈最高見過23,517點，剛觸及10日線遇阻力，昨日10日線再向下移至23,443點，由22,565點展開的反彈能否延續落去，挑戰九月初至今跌浪的0.382反彈阻力在23,633點，短期關鍵仲係睇指數能否成功突破10日線阻力，現貨市場交投會否再回升。