劏細同拆售物業係今年工商舖市場交投嘅動力，劉Sir計一計數，今年到依家至少有8個拆細項目推出。當中包括舖位、車位同迷你服務式寫字樓，涉及成交總值至少有23.8億元。套現最多係佳寶集團賣出嘅屯門壹號總站劏舖項目，套現近7億元。

屯門壹號總站上月開售至今已沽出近九成舖位。

本年部分拆售車位及舖位項目

眾多劏細項目，無論係舖位、車位，定係迷你服務式寫字樓，購買優惠彼此差唔多，全部至少都會向買家提供首兩年5%租金回報保證，有啲項目第三及四年都會有租金保證。

嘉湖新城兩日銷九成

今年拆售嘅劏舖以新界西物業居多，好似投資者陳秉志持有嘅嘉湖新城項目，四月開售短短兩日賣咗近九成舖位，全數189個舖位沽清，套現約4.5億元。

而另一個資深投資者林子峰三月份拆售嘅元朗又一新城項目，全數149個舖位賣咗個多星期就沽清，套現約3.6億元。但講到今年暫時嘅套現王，應該係新手加入拆舖行列嘅佳寶集團，拆售嘅壹號總站，上月初開售到依家已沽出近261個舖位，佔總數約87%，套現約7億元，成為套現最多的拆售項目。

另外，市區都有劏舖推售，好似蔡志忠嘅北角英皇大道廣場，八月開售至今沽出逾七成舖位，約莫113個舖位，估計套現至少2.7億元，該項目亦係今年眾多劏場中售價最低，僅97萬元起，最細舖位建築面積只有約29.8方呎。

亦有投資者轉軚睇好商廈市場，林子峰早前就變招將舖契物業打造成迷你服務式寫字樓，喺六月推出深水埗SoHo WEST西九龍商務中心，約80個迷你服務式寫字樓，開售一小時即沽清，係今年最快沽清嘅拆售項目，套現約1.5億元。

新蒲崗450車位速沽

美聯工商舖舖位部盧展豪話，市場對細價物業需求大，但拆售物業都好睇位置同舖位面積等因素，唔係拆得愈細，就會賺得愈多。

車位拆售亦獲市場受落，陳秉志持有嘅新蒲崗康景樓450個車位，七月中開售，兩周內已全數沽清，套現3.6億元。