美國議息前魚缸觀望氣氛濃，大價股唔郁，反而細價股聚到人氣。好似尋日主板二十大升幅股份，逾半係毫子股。今日揀隻正正路路的中資股中國中冶（01618），主要見過呢三個月股價交投持續活躍，尋日跌市股價仍逆市靠穩，平收在1.93元，睇勢短線可試衝52周高位2.02元。

中冶主要係做工程承包、資源開發、裝備製造及房地產開發等，近年積極加大區域拓展，並發展非冶金業務及海外市場，戰略已逐步展現成效，抵銷內地鋼鐵行業低迷的影響。今年上半年，其新簽合同額同比增長62%至1,782億元（人民幣．下同），其中非冶金合同佔八成；期內營業收入增長5.5%、純利增長22.2%至18.1億元。

今年首八個月，其累計新簽合同額增至逾2,200億元，同比增長54%。如無意外，下半年業務表現可勝上半年，現價往績市盈率9倍，息率3.8厘，估值具支持。

斷秤穩穩陣陣，即使呢個禮拜外圍消息令魚缸震動，呢隻股都有得守。若市況對辦，呢隻股價位都合炒家胃口，見佢回吐壓力唔大，氣氛配合到有機會聚到人氣踢上2港元樓上，可搭轉順風車機會。