樓市沒有不可能，荃灣地之前賣出好價，同區御凱一個天池屋單位啱啱竟以約4,550萬元沽出，雖然成交價唔及同區萬景峯複式單位之前做價近5,000萬元咁貴，但實用呎價逾2.1萬元，就創咗全區新高。而尋晚打風，無阻買家用新高價買鰂魚涌太古城單位，實用呎價逾1.82萬元。

荃灣御凱有天池屋單位易手，實用呎價創全區新高。（資料圖片）

天水圍栢慧豪園實用呎價由六月份至今上升一成四。（資料圖片）

近日二手市場高價個案

美聯史偉森同劉Sir講，啱啱賣咗嘅御凱複式天池屋單位，建築/實用面積約2,963/2,102方呎，有私家泳池同逾2,200方呎花園，加埋汀九橋全海景，係同區獨一無二嘅放盤。

上址原本開價5,800萬元，最後俾「知音」廠家用4,550萬元買嚟自住，建築/實用呎價15,356/21,646元，荃灣住宅呎價第一次升穿2萬元，銀行估價仲要差唔多。

睇番土地註冊處資料，呢個單位○八年一手買入價3,321.5萬元，除咗做一按，喺一三年做咗2,900萬元人民幣二按。

尋晚打風期間，美聯施洐銘話，有個買家打風都唔怕，為咗要買靚貨，連價都唔講即用1,360萬元，買入鰂魚涌太古城銀星閣高層H室，實用面積747方呎，實用呎價約18,206元，創同類單位新高。

長沙灣四小龍旺市

細單位個價都好癲，代理話，長沙灣碧海藍天3座高層戶，實用面積510方呎，賣咗730萬元，成為屋苑最貴兩房戶，實用呎價14,314元。中原許永生講，同區西九四小龍市況活躍，兩日賣咗7個單位。

代理又話，將軍澳新都城2期11座高層單位，以485萬元賣出，實用呎價13,361元，呎價係呢個屋苑嘅新高。

栢慧兩個月搶高14%

睇番中原個城市領先指數，18個新加入嘅成分屋苑，5個跑贏大市，4個係新界屋苑，其中天水圍栢慧豪園同栢慧豪廷，實用呎價由六月到依家已經升咗14%。

屯門樓價升得都好勁，該行話，華都花園5座中層E室賣383.8萬元，實用呎價約7,201元，係屋苑三房戶嘅新高。

人人搶入市，交投表現唔錯，利嘉閣數據，50個屋苑上星期錄到161宗買賣，按周升30%，同期樓價升咗1.2%；中原話，沙田第一城今個月暫時有15宗買賣。