偷雞博歐元目標1.35

美國聯儲局副主席費希爾上任後第一次發言，指勞工參與率低係拖累美國復甦的元凶，不過市場似乎無咩反應，睇嚟八月二十一日Jackson Hole央行年會前美元仍佔上風，但要向上突破暫時未係時候。

一眾外幣跌至關鍵水平，要反彈亦非無可能。回顧歐洲央行減息以來，經濟數據似乎未有改善，歐元區三大經濟體亦證實經濟無起色，加上近月地緣政治風險升溫受影響最大的乃歐元區。

如果今次歐元區經濟出現負增長，連埋早前公布的通脹只得0.4%，相信要求歐洲央行要進一步推出量寬的壓力將更大，短線支持位仍是1.3300，下降趨勢相當明顯，一日喺1.3500至1.3530樓下，睇歐元跌的機會仍然極高，短線想偷雞的話，記得放止蝕位，同1.35前就先行獲利平倉，建議都係見好就收。