港股前日裂口高開高收後，尋日有條件再挾一下淡倉然後反手殺落，但事實卻是先行整固。看來後市睇升唔係單純大戶挾倉咁簡單，總之有貨就要坐定定，咪心急落車。

第一視頻同時具有手遊及彩票概念。(資料圖片)

據講，滬港通好大機會在十月二十日啟動，券商股繼續受捧。尋日晨咁早收到股友打來哭股喪，話1.1元開始買隻信達國際（00111），1.5至1.6元高高興興沽貨獲利，點知沽完先大後悔，尋日高位見2.44元，接佢貨的仲贏得多過佢！

炒股就係咁，賣仔莫摸頭，收拾心情搵第二隻滄海遺珠仲實際。尋日就見到隻東英金融（01140）成為炒家冷敲目標，股價曾急升六成，成交增加，短線守穩1.6元水平應該仲有得諗。

華彩績前可關注

第四批iBond（04222）尋日首日登場，唔少幫趁券商認購的散戶可即沽賺餐茶錢，雖則話港人認購獲派兩至三手，首日係穩賺不賠，但短線沽出變成投機行為，賺一千幾百又如何抗通脹？勞斯動眾，用公帑卻僅惠及一小撮人。只是，從香港債市極待發展的角度睇，發行iBond亦實在有其必要。

騰訊（00700）繼續在高位徘徊，尋日一度觸及一年高位134元，收報133.3元，升0.7%。今日騰訊公布業績後股價係上定落，相信一回落至130元或樓下就有人博，等九月阿里在美上市食胡。

除了科網股可以留意，彩票股同屬等翻炒對象，尋日就見隻華彩控股（01371）升4%，公司將於下周二宣布中績，呢浪企得穩在0.7元樓上，可以關注。

此外，同屬手遊及彩票概念的第一視頻（00082）亦見異動，高位0.77元，收報0.76元，升4%，成交7,781萬元，乃六月下旬旗下在美上市的中國手遊出現高層人事變動以來，表現最佳的一個交易日，股價以大陽燭重上10日及50日線，向上主要阻力在250日線0.85元，初步支持在0.72至0.73元。

第一視頻月初預告上半年業績仍錄得虧損，但同比虧損額有所減少，主要係受惠於手遊業務成功轉型以及期內推出多項推廣活動，令彩票相關業務保持好表現。咁講法，盈警中又有盈喜，唔係一面倒利淡。無可否認，呢隻股走勢都幾飄忽，唔容易捉路，但只要新興產業股氣氛轉熱，其擁雙概念又唔難有作為，即市睇實成交見機行事。