近期非核心區寫字樓買賣成交爆旺，尋日東九龍區嘅億京中心低層全層就以逾1.17億元售出。有代理同劉SIR講，個單位業主喺一一年買入，三年間升咗值差唔多四成，直情拍得住住宅物業。另外，近排新地（00016）推售嘅黃竹坑商廈W50再加推12樓及25樓兩層，售價6,600多萬至7,000多萬元。

東九龍億京中心A座低層全層，以逾一億一千七百萬元連租約售出。(資料圖片)

觀塘宏基資本大廈有全層物業易手，呎價九千九百元。(資料圖片)

近月非核心區寫字樓全層成交

有代理同劉SIR講，九龍灣億京中心A座低層全層，建築面積逾1.25萬方呎，啱啱以逾1.17億元連租約售出，呎價約9,350元，宜家以呎租20元租緊出去，租期去到明年第一季。

個代理仲話，原業主喺一一年只係以約8,400萬元買入，三年間就差唔多升咗四成咁多，升幅拍得住住宅物業，賺咗3,300萬元。

另外，黃竹坑商廈W50又再加推兩層，包括12及25樓全層，建築面積約5,225及5,235方呎，售價6,687.4萬同7,066.8萬元，而該廈早前推出嘅26樓，其中2至8室六個單位已成功賣出。

旺角好景月底拆售

至於舖位市場方面，最近再有投資者拆舖，旺角花園街好景商場二樓重新命名為「旺中旺」，涉及79個舖位，入場費約260萬元。

中原莊朗文話，佢哋將會代理拆售「旺中旺」商場，舖位建築面積由約60至300方呎，入場費約260萬元，而項目市值約莫3億元。業主會向買家提供首兩年5%的租金回報保證。

該行潘志明又話，新商場應該會喺下周開始收票，到八月底就會開賣，成交期去到下年嘅一月十五日，相信下年嘅年中可以收舖。

屯門物業獲買家洽

業主代表殿堂物業董事余旻修話，項目係六月以1.26億元購入，面積約1.2萬方呎，呎價約1萬元，商場裝修費就差唔多1,500萬至2,000萬元。

余旻修又話，佢哋公司之前管理過同區旺角中心商場差唔多十五年，有足夠管理經驗。

美聯楊開永指出，有個資深投資者正洽購屯門龍門路43號一項單幢式物業，面積約2.2萬方呎，意向價約8,800萬元。