上周五美股回升，支持昨日港股反彈，惟成交不足，繼續教指數裹足不前。恒指最後升113點，報23,346點，大市成交不足500億元，未算配合升勢。即月期指日市收23,366點，高水19點。

恆指期貨走勢

年初至今恒指累積升幅不到1%，對比歐美股市遠遠落後。當然，港股的難兄難弟，滬綜指仲跌緊2.3%，在歐美經濟復甦相對明朗，吸引全球資金追捧下，年初至今的中港股市表現，是相形見絀。

近期港匯持續強勢，可是，港股仍保持偏低的成交額，似乎熱錢純粹做住塘邊鶴，未有積極投入港股市場，到底所謂何事？等政府政改諮詢及佔中形勢塵埃落定？等滬港通正式開行？等中國經濟及人行財政政策的轉捩點出現？抑或等資金大氣氛由成熟市場回流亞洲發展中市場？筆者眼中，幾個理由都有一定可能性，影響着近期港股表現。

唔少朋友對後市樂觀，但對邊類股份可以跑出卻未有想法。以23,300點計，「大期」及「細期」相當於116.5萬及23.3萬元現貨，如果唔炒出炒入，當買指數等候未來兩三個月可能出現之升浪，其一買一賣的交易成本，要比買入ETF或者盈富基金（02800）更低。