上星期美國聯儲局公布會議紀綠，亮點係一眾委員似乎已同意於十月完成整個買債計劃，但對於息口走勢，聯儲局就繼續維持一貫嘅鴿派立場。

美元兌加元走勢

背後嘅解讀係，聯儲局認為就業市場持續好轉。奇怪嘅係，一眾聯儲委員喺上周末段各自發言，大家對通脹、息口都有唔同意見，睇嚟耶倫出席聽證會真係要畀少少方向，而筆者之前提過八月嘅央行年會Jackson Hole，睇嚟聯儲局面對愈嚟愈大嘅壓力去解畫，只要立場、措詞上無之前咁悲觀，就足以令美元上升。

本周市場有數個焦點，包括美國企業業績及一系列美國經濟數據，而更重要應該係歐洲央行行長德拉吉、英倫銀行行長卡尼都會先後發言，而澳洲央行、加拿大央行等都會舉行議息會議。

隨着聯儲局加息壓力漸增，只要其他央行轉鴿，其貨幣下半年被拋售機會就愈高，即使係上半年一直睇好嘅英鎊同紐元，其升勢已出現一段時間，九月蘇格蘭公投，或成英鎊調整藉口，阻力仍在1.7250至1.7330，支持1.7080，更明顯的支持在1.6870。

幾間央行議息，筆者就比較留意日本央行及加拿大央行，只要美國債息回升，美元兌日圓及美元兌加元出現回升機會極高，其中美元兌加元止蝕仍在1.0560，目標先看1.0850，年內重新挑戰今年高位1.12水平機會仍高。