近年細細件百零萬至二百萬嘅劏舖買賣成交反應不俗，反映低息下資金苦無出路。早排拆售天水圍嘉湖新城舖位嘅資深投資者陳秉志，啱啱又有新搞作，將會喺今個星期三，拆售新蒲崗康景樓停車場。首階段先推191個高層車位，售價只係由48萬元起。以四成按揭計，唔使30萬就可以有物業收租，依家批車位已經收票超過2,500張，超額認購約12倍。

有投資者將於今個星期三，拆售新蒲崗康景樓停車場，首階段先推一百九十一個高層車位。

將拆售的新蒲崗爵祿街康景樓車位詳情

香港置業至尊旺舖陳偉材尋日同劉Sir講，新蒲崗爵祿街86號康景樓停車場450個住宅車位將會拆售，涉資約3億元。

連約保證回報5%

首先會喺今個星期三拆4樓同5樓共191個露天及有蓋車位，其中5樓有露天同有蓋車位，露天嘅售價只係由48至58萬元，有蓋車位就由59至69萬元。至於四樓就全部都係有蓋車位，售價就由66至91萬元。

佢仲話，業主會提供五年期貸款計劃，貸款額為成交價嘅四成，息率5%；如果買家係選擇連約成交，就保證提供兩年5%回報，相反如果以交吉成交，就冇回報保證。

陳偉材又話，如果星期三銷情理想，就會即日推出所有車位。佢話依家已經收咗超過2,500張票，超額認購12倍，其中更有大手準買家入票10張。

該區住宅新盤譽．港灣喺一三年有個車位以170萬元成交，同區嘅新蒲崗廣場車位都要超過90萬元。近年細價投資物業係市場上非常難搵，上車盤都要三百萬元，喺苦無投資機會下，資金惟有尋找出路，車位投資成為不少投資者嘅目標。

該行工商舖行政總裁黃漢成就話，早前政府打擊炒風，現時市面上嘅物業投資工具不多，加上依家新蒲崗車位售價一般都要過百萬元，該盤車位低水，有一定吸引力。

鰂魚涌舖逾億沽

另投資者李耀華證實，鰂魚涌惠安苑由銀行租用嘅地舖，啱啱以超過1億元賣咗；至於九龍城福佬村道學林軒其中一個地舖，獲買家出價超過4,000萬元洽購，個舖面積近1,300方呎，呎價約3萬幾元。

中原黃金鳳就話，旺角彌敦道580G至K號地下三相連舖，面積共約2,565方呎，一併以意向月租130萬元放租，呎租約500元，前租客係連鎖珠寶店。