周三跌完三百幾點，尋日港股反撲的氣勢認真一般，當然，早市中國公布出口數據差過預期，亦限制了大市升幅。恒指在全日不足百點波幅下，最終收報23,238點，升62點，唯一可喜的是21,705至22,829點兩個低位延長線支持尚未失守。

恆指期貨走勢 2014/7/10

主板成交由前日的640億回落至476億元，即月期指日市收23,206點，成交同樣大幅萎縮，得2.6萬張，比前日的4.9萬張足足少四成七，反映期指客都抱住一動不如一靜心態，等市況突破再諗。

退後一步，大市由去年十二月高位24,111點高位，跌到今年三月21,137點見底，假如目前處於一個中期升浪，恒指無理由反彈上0.764重要反彈阻力23,409點樓上，只停留短短五日就走番轉頭，尤其是各項客觀條件，例如內地PMI數據及港匯續強，都在在有利於大市向上突破。應升唔升的港股，開始令人抱有戒心。

筆者認為，大市最好盡快重上23,409及23,626點樓上，以確定周三急跌僅是升市的一次後抽，而唔係大市由強轉弱勢的轉捩點。尋日恒指MACD已完成背馳並現熊叉，技術上，短期形勢不太樂觀。