政府近年都推唔少住宅地皮，加埋市場上嘅私人發展項目，帶動五月份入則申請創新高。屋宇署最新資料顯示，五月收到55宗入則申請，係一一年發水新例實施以來嘅單月新高。期內該署亦批出12份建築圖則，包括政府批出嘅住宅發展，以新地（00016）西鐵南昌站上蓋項目最有睇頭，獲准興建合共14幢住宅。

西鐵南昌站上蓋項目獲批建築圖則，准興建合共14幢住宅。（構想圖）

五月份入則申請，是發水新例實施以來的單月新高。（資料圖片）

五月份獲批建築圖則住宅項目

劉Sir參考屋宇署截至五月底嘅最新資料，發現該署五月共收到55宗入則申請，其中48宗屬首次申請，兩個數字都係一一年三月後最多。

劉Sir好記得當時發展商為咗趕搭「發水尾班車」而蜂擁申請入則，令到當月收到多達176份入則申請，呢個紀錄至今仲未被打破。

此外，屋宇署喺五月批出咗12份圖則，其中4份係住宅及商住項目。包括上述南昌站上蓋發展，准建合共14幢分層住宅，其中7幢係40至44層嘅高密度住宅；而另外7幢就密度較低，樓高6至9層。成個項目嘅住宅及商業樓面分別約230萬方呎及33萬方呎。

信置西貢准建4幢

至於信置（00083）舊年年初投到嘅西貢沙角尾住宅項目，就准建4幢7至8層高住宅，另設1座會所。項目總樓面約24.9萬方呎。

而上環皇后大道西150至154號住宅項目，亦可建1幢29層高商住物業。

私宅落成大減76%

至於私宅落成方面，五月份有回落迹象。劉Sir知道，五月共有334個私宅單位落成，對比四月大減約76.1%。睇番今年頭五個月嘅落成數字，累積落成單位有約4,612伙，佔全年預測落成量嘅約26.2%，而比起舊年頭五個月就勁升約2.17倍，創近四年同期最多。

雖然目前私宅落成進度一般，不過老友美聯劉嘉輝就唔係咁擔心，佢預期下半年會有多個大型住宅項目落成，再加上部分原定舊年落成嘅私宅項目會順延至今年，認為今年落成量仍有機會達到政府預測約1.7萬多伙嘅目標。

五月份私宅動工247伙，按月減少44.6%，頭五個月累積動工量共2,762伙。