魚缸Blogger：中航工業走勢漸強

中航工業（00232）從事針織及紡織業務，以及航空技術相關業務兩大範疇，去年上半年勁蝕2,694萬元，下半年急起直追，全年轉賺3.97億元，按年增長10.5%，功勞係來自期內錄得出售新寶股權收益。

近排中航工業宣布，在浙江省及周邊地區開拓電力設備貿易業務，涉及供應原材料及輔助材料，可唔可以帶嚟增長動力言之過早，但相信起碼能夠幫補一吓見紅的針織及紡織業務分部。至於航空技術相關業務分部，雖然公司有權分佔80%主要股東中航國際來自營運EC120（直升機）項目的淨收入，不過因中航國際同意分攤的間接費用，僅限於唔多過應佔收入減所有直接成本及開支，所以項目並無錄得任何盈虧。

如果睇圖，近日股價醞釀雙底反彈，尋日即市一度掂到頸線阻力兼3毫子關，以0.295元收市，升幅1.7%，配合大成交兼短線黃金交叉利好，有勢挑戰250日線0.32元。