個市近期唔上唔落，成交日日得四字頭，真正悶死人。近期市場無主題，且資金流動性減慢已成常態，以近期每日波幅得百餘點計，炒即市難以搵食。

恒指期貨走勢

講番即市，外圍股匯債市皆無異動，美國十年期國債孳息在2.5至2.6厘水平反覆，歐美股市在高位徘徊，外幣除英鎊較強外，其餘外幣以橫行整固為主，在如此投資環境下，要港股獨領風騷確實有困難。

昨日恒指大部分時間於23,170至23,220點水平上落，最後跌21點，收報23,181點，主板成交463億元。即月期指同樣無方向，期指日市收23,173點，升17點，低水9點，成交張數只有3.69萬張，但未平倉合約就有近11.29萬張，反映在市況淡靜下，部分以往炒即日鮮者被迫要持倉過夜。

部署方面，由於未知聯儲局會否「出意外」，加上此前市況窄幅波動亦欠值博率，持貨過夜博唔過。反而今日會觀察昨晚美股及今日港股開市反應作兩手準備：若期指開於23,300點水平會即市短沽；相反，若低開於22,800點水平則會短揸，賺130至150點就平倉甚至反手做，一於小注怡情。