上周四新西蘭央行議息，除咗將官方利率加至3厘外，會後聲明繼續強硬，話加息周期將持續至當地需求唔再上升為止。炒外匯搵方向，離唔開「加息預期」同埋「息差優勢」，雖然加息預期某程度上已經消化，但息差優勢就愈來愈明顯，紐元兌息口第二高的澳元，息差都拉開至半厘，兌美元同兌歐元等近零息嘅外幣，優勢就更加明顯，故中線繼續睇好方向未變。

紐元兌美元走勢

歐洲通脹低就係人都知，而歐元長期喺1.38高水平，令通脹難以回升，德拉吉亦講經濟有下行風險；美國聯儲局主席耶倫亦都出口術話，嚟緊加息要睇就業市場同通脹，暗示加息步伐唔會太快。不過，新西蘭央行就唔同，會後聲明講到明通脹壓力喺未來兩年繼續增加，提及通脹的字眼亦有十次，反映雖然新西蘭央行都擔心匯價過高，但通脹風險比較重要。

重磅數據打破悶局

今個星期中段開始，將重新有重量級數據公布，美國第一季GDP、聯儲局議息會同埋非農業就業數據，將先後喺星期三、四、五公布，預期將打破呢兩星期超級窄幅波動的市況，重新吸引投資者入市。預期紐元0.8350至0.8380區間亦都提供不俗支持，維持建議0.8430買入紐元，止蝕於0.8350，目標先睇0.8600，達標後再睇歷史高位0.88水平。