上星期華爾街科技股走勢猶如山泥傾瀉，Sell in May的威力漸漸顯現，尋日港股106點波幅悶足全日，指數收市跌91點，報22,132點，睇落跌得溫和，實質下跌股份達1,136隻之多，足足較逆市做好的274隻股份多3.1倍。

地產股估值已過分反映負面因素，只待政府無形之手撤出市場。（資料圖片）

太陽日誌 2014/4/29

綜合大行預測新世界業績（港元）

唔少基金股隊到開巷，尤其美國網購股亞馬遜（Amazon）發出淡淡哋的營運指引，網絡及手遊股跌到一仆一碌，股王騰訊（00700）跌2.8%，收報508.5元，三隻半新股無一幸免，IGG（08002）跌14.5%、雲遊（00484）跌8.2%，博雅（00434）跌6.9%，雙馬概念股中信21世紀（00241）及華南城（01668）亦齊齊跌4.4%，芬佬個個都要錢唔要貨。

今日期指結算，成個四月指數還原基本步，尋日較三月底22,151點微跌緊19點，最攞命係中間有滬港通消息，四月中以逾千億成交炒個市上去三個月高位23,224點，唔知幾多基金大戶或普羅散戶被綁在23,000點樓上。

舊經濟股獲青睞

不過，觀乎港匯尋日企在7.7527，貼住今年高位，資金無外流迹象，睇怕大市短期都仲係上落市格局居多，即使外圍氣氛再差，中短期恒指未必需要跌穿兩萬一點。

尋日相當明顯嘅係基金換貨，繼續質新經濟股，買番舊經濟股，恒指領袖股有中移（00941）、聯通（00762）、中海油（00883）、中石油（00857），仲有係幾隻近期未有跟隨大市向下的本地地產股。在聯儲局主席耶倫再三澄清，美國未有耐需要加息下，十年美債息在2.7厘徘徊，未有再試3厘高位，一些收息公用股走勢都好番唔少，中電（00002）、電能（00006）、煤氣（00003）及長建（01038）尋日都逆市做好。

新世界投機值博

雙辣招下香港樓市被冰封一樣，不過睇番恒指地產分類指數，其實早於○七年見頂之後，已經無跟住樓價再創新高，目前平均市帳率只係0.7倍，三成的折讓可反映特區政策風險、樓價可能要跌一至兩成的預期，或者辣招下樓市成交由以往每月1萬至1.2萬宗跌到4千至5千宗，發展商售樓量減少的問題。

不過，近廿年本地地產股市帳率大致在0.6至2倍之間上落，目前水平與九七及沙士時低位僅一步之遙，以今日經濟情況，種種負面因素相信已經充分甚至過分反映，問題係特區政府無形之手，幾時先會撤出市場。

筆者已多次提出，地產股再跌幅度有限，只係未知幾時會再獲基金垂青，屬守株待兔型股票。今年以來地產分類指數累跌2.4%（恒指跌5%），五大地產股中，長實（00001）升10.3%，信置（00083）升8%，恒地（00012）升1.9%，新地（00016）跌1.8%，最曳係供股拖累的新世界（00017），一度跌逾一成，也是筆者認為投機吸引力最高的一隻，其0.37倍市帳率，較十五年歷史平均0.57倍折讓35%，當然如果佢私有化新世界中國（00917）被否決，供股變減債就更理想。