若然齋睇指數，定必完全感受唔到尋日港股的真實市況。恒指全日波幅僅105點，收報22,132點，跌91點，大市成交僅528億元，但濠賭及科網股沽壓大，騰訊（00700）跌近3%，TOM集團（02383）跌9%，網遊股更成重災區，IGG（08002）急挫14%，雲遊（00484）及博雅（00434）分別跌8%及6%。其他板塊如電動車、光伏以及晶片股，均現不同程度跌幅，看來大家對「五窮」都高度戒備。

粵投主要收入來自供水業務，未來可望受惠於中港兩地水價上調。（資料圖片）

內地A股在五一假前亦現沽貨散水潮，滬綜指險守兩千點大關，收報2,003點，跌幅1.6%。有指政治局會議提及對經濟工作的部署，指要加強對實體經濟的支持力度，並提出鐵路、京津冀、信息和養老健康服務業四大亮點，以期能促進居民擴大消費。凡此種種，唔係唔好，但要時間才能見到成效。

滬港通睇唔通

在這個非常時期，只能順着國策小注怡情玩板塊對對碰。有表叔話，滬港通係一個時間表，當十月開通之日，就係兩地股市調整完成重拾升軌之時。不過，半年之後，亦係人稱「股災月」的十月，又會唔會有咩新的不利因素出現，從而抵銷滬港通的正面影響？

「五窮」想搵避險之選，阿莊想起粵海投資（00270）。以現價7.78元，與五十二周高位8.17元及去年底收市價7.58元的距離都不太遠，但總體而言，股價表現硬淨，強於大市。粵投的主要收入來源自供水業務，據講香港經已十九年冇加水費，今年政府擬加水費，咁對粵投自然係好消息，未來在兩地商議供水價時有提價空間。

雖然供水業務乃其主要收入來源，但公司同時拓展物業、百貨、酒店及電力等業務，有助分散風險之餘，亦能藉此提升資本回報。截至去年底，其手頭現金按年增兩成至65億元，處於淨資金狀況，加上經營現金流量達半百億元，強勁的財政狀況，為其「避險」特性提供有力支持。

以現價計，粵投預測市盈率12倍，息率2.9厘，估值中規中矩。假設末季香港開始落實加水費，第二及第三季應該是留意收集粵投的好時機。走勢上，監於8元關阻力暫時未能攻破，可待回落至7至7.5元水平才分注收集，不跌穿6.7元可續持有，年底前目標上試8至8.5元。