市場冇乜平盤，買家見有平盤都會搶。好似天水圍嘉湖山莊有個三房單位，上個星期六開畀人睇樓，開價305萬元，係有樓睇之中開價最平，兩日就已經有逾廿組客爭住睇樓。上述單位業主見個勢勁，即刻連加3口價共15萬元，反價到320萬元。不過，班準買家就話要諗吓先。啲放盤咁「矜貴」，個樓價又點會跌得落呢？

嘉湖山莊景湖居有三房單位，放盤兩日已有廿多組客睇樓。（資料圖片）

買家爭購細價樓情況

中原馬斯力同劉Sir講，呢個嘉湖山莊景湖居2座中層三房單位，建築/實用面積約701/546方呎，上個星期六個租客約滿走咗，業主拿拿臨交低鎖匙畀人睇樓。

過去星期六、日大大話話有廿幾組客上去睇樓，有4至5組客更加即刻簽票畀臨訂講價，業主都畀個勢嚇親，開價由原本305萬元，連加三口到320萬元，加得咁快，班客都話要諗下先。

其實嘉湖山莊呢排幾多成交，祥益蕭嘉偉話，樂湖居13座高層兩房單位，上車客做九成按揭約278萬元買咗，實用呎價約6,205元。

碧湖實呎價創新高

細價盤成交多，買家見盤就搶。六福行吳家榮講，粉嶺區大屋苑過去三日，已經有至少7宗買賣。

牽晴間10座高層E室，實用面積約384方呎，放盤兩粒鐘，即賣313萬元，實用呎價約8,151元，比開價只係平咗9萬元，期間都有4至5組客搶住睇呢個盤。

同區碧湖花園5座高層F室仲誇，以305萬元沽出，實用呎價約7,625元，係今年同類最貴。

無盤個價點會跌，鰂魚涌太古城再有兩宗買賣。中原莊素娟講，銀星閣低層H室，賣1,080萬元，實用呎價成1.44萬元，望樓景嘅話，當然係理想價。

瓏門辣招盤蝕20萬

另一方面，一手新盤大把供應，半新盤業主繼續蝕。有代理爆料，大埔承峰3座中層單位，啱啱賣咗約902萬元，實用呎價約9,242元，連埋使費約兩年半估至少蝕70萬元。

屯門瓏門5座高層F室辣招盤，都賣約415.8萬元，實用呎價約11,147元。

原業主揸貨一年半，單位個價只升約3%，加埋SSD同其他使費要蝕約20萬元。