復活節長假完畢，由於A股滬綜指尋日以低位收市，跌幅1.5%，似乎港股復市低開機會大。加上月底前還有一系列經濟數據及聯儲局會議，相信市況會維持觀望，恒指短線波幅介乎22,200至23,200點水平，整固待變。

中興首季業績反映盈利穩步復甦，估值具上調空間。（資料圖片）

首季內地經濟增長遜預期，連全國沿海最繁榮的省份廣東，首季GDP增速亦僅得7.2%，低於全國平均水平，同比跌1.3個百分點，相信係同內地進出口情況未有改善，加上房地產市道持續調控及打貪掃黃成效展現有關。難怪本月以來，上大人不斷出招力挺經濟，除鐵路基建投資，金融方面有內銀發優先股、滬港通，上周五又傳來會適時在沿海地區啟動新核電項目的消息，但當然，呢啲措施最快下半年才逐步見效，次季都係要捱日子！

股仔趁淡市發圍

華潤集團高層被中紀委調查，雖然消息流傳已久，但如今成事實，中企圈子人心惶惶，皆因意味中央打貪已去到央企及海外中資企業。現時中紀委打貪大旗由熟悉中企及金融運作的王岐山主持，會否藉此為央企系統來一次大清洗，就要擔定櫈仔等睇戲！

市況淡靜，正是個別板塊及股仔發圍的機會，上周唔少累積頗大跌幅的二、三線股反撲，好似中國鐵聯（00745）狂飆65%、中滔環保（01363）升5%、百勤油服（02178）升12%，呢類股唔係唔博得，但最好揀估值有數得計的，升跌起嚟有個譜；那些缺乏基本因素支持、業務處轉型過程當中的股仔，宜盡量迴避，以免連渣都冇！

內地智能手機競爭白熱化，產品性價比甚高，但亦意味廠商的毛利率受壓，睇近月酷派（02369）、通達（00698）、富智康（02038）股價走勢偏弱，便可知一二。不過，兼營電訊設備以及手機製造業務的中興通訊（00763），股價由上月低位14.36元，升至上周高位見16.74元，上周四收報16.18元，主要係受季績盈喜帶動。上周四公司正式公布首季純利增逾兩倍至6.22億元人仔，並預計上半年純利增幅介乎1.5至2.2倍，至介乎8至10億元人仔，料對股價起支持作用。

與手機股唔同，中興係內地大型電訊設備供應商之一，手機業務只係其中一項策略性業務而已，故手機市場競爭白熱化引發的沽壓，對中興影響不大。反而，季績反映盈利穩步復甦，估值尚有重估空間。以預測市盈率25倍計，合理值可見18元，主要支持在250日線15元。