樓市好景嗰陣，大把地產代理行爭住租近港鐵站嘅大圍村南道地舖。不過，樓市近年交投大插水，呢類租戶數目近年已萎縮達五成，剩低唔夠10間。個別代理新租個案，租金升幅連7%都無。反而，愈來愈多內地旅客到該區消費，條街吸引咗唔少連鎖食肆、餐廳及珠寶金行搶租進駐，有啲成交租金升幅倍增之外，部分呎租更突破1,000元，貼近九龍市區二線街舖呎租水平。

內地旅客到大圍區消費日增，而村南道就吸引不少連鎖食肆、餐廳及珠寶金行搶租進駐。

旅客心聲
購物方便
來自深圳的賴先生認為，大圍可以買到不少日用品，較旺角區更加方便快捷。

大圍村南道地舖最新租賃成交

劉Sir日前去大圍睇過，對住港鐵大圍站出口嘅村南道，約莫有30個地舖，當中只有9間舖租戶係地產代理。

有代理老友話，旺市時條街約六成舖位租戶都係地產代理，因物業成交減少，市場少有搶租舖位情況，依家條街代理行數目比起一、兩年前，減少約五成。

聽講早排一個面積約400方呎單號舖，畀代理行以每月約16萬元租咗，呎租約400元，比起之前零食店月租金只多約1萬元，租金升幅不足7%。

時移世易 代理讓路

另現由美聯物業租緊嘅15至35號地下25號舖，面積約500方呎，月前獲連鎖珠寶金行以每月約52萬元預租，呎租約1,040元，新租金升約30%。

喺該街賣小食約二十年嘅陳先生話，「約五、六年前仲有唔少地產代理行搶租舖位，可能係近年地產市道麻麻，單喺舊年已有兩、三間遷出。」

西餅店貴近倍爭贏

近年內地旅客多咗喺新界消費，地舖租戶變化好大。聽講喺中港兩地都有分店嘅本港餐廳集團，早排預租41至51號地下部分連閣樓，面積共約4,500方呎，月租金約50萬元，呎租約110元，個舖原由業主自用，反映新租戶睇好後市。

區內名城、盛薈及盛世等相繼入伙，唔少住戶都係高消費一族，所以吸引唔少大型食店進駐。原由鞋店租用嘅15至35號地下21號舖，面積約400方呎，畀連鎖麵包西餅店東海堂以每月約18萬元租用，呎租約450元，較前租金大升96%。