Fundman睇市：內房殼股 難寄厚望

分析員認為數據確認北美經濟逐漸擺脫年初惡劣天氣的影響。隨着製造業進入新投資周期，大行對明晚公布的三月份就業數據，信心日益增強，最新估失業率會落番6.6%，新增非農職位首季以來首次重上20萬份。

外圍氣氛唔錯，港股繼續做好，尋日大市升75點，收報22,523點，因為發優先股消息低位反彈唔少的內銀、內險股開始力弱，特首指雙辣招收到階段性成果，港人港地暫時擱置，地產股成為升市火車頭，昨日恒地（00012）、恒隆地產（00101）、新地（00016）及長實（00001）升幅介乎3.2至4%。

基金補倉地產股

事實上，樓價同歷史高位比較，得幾巴仙的回落，不過恒生地產分類指數，只係得○七年高位40,024點的七成左右，首季恒指跌4.9%，大部分藍籌地產股升得唔多，但已經出現跑贏指數迹象。港人港地政策靜靜雞入咗櫃桶底，係咪減辣先兆？睇落就唔多似，不過地產股在基金經理組合中under weight得太緊要，季結後無乜故事，短期基金補倉下繼續升都唔出奇。

幾隻內房殼股死貓彈，金地商置（00535）升13.7%，綠地香港（00337）升8.8%，萬科海外（01036）升7.2%，招商局置地（00978）升5.6%，可惜股價同去年初高位比較，計落得番35至58%，水瓜打狗唔見一截。

一直搵唔到理由買這類內房殼股，縱觀本地股市，撇除中海（00688）及潤地（01109），掛牌內房股一般資產折讓都已經去到四至七成，憧憬母公司以大折讓注資可以益到香港小股民，簡直天方夜譚，真係咁睇好，倒不如直接買內房股好過。

合理推想，如果有好項目，斷估都留番畀上層公司去做，好難益到落去下面的殼股公司，但內地房企紛紛來港借殼，講到底，同內地收水、尤其房地產及相關融資愈來愈困難有關。

內地地產商轉戰香港，藉窗口公司借平錢，即使要畀高昂殼價，計落都係除笨有精，好似原名東力的招商局置地，舊年十二月發5億美元債，成本只係4.02厘，綠地香港去年底今年初已經發債吸水兩次，成本講緊4.75及5.5厘。要知內房發美元債，閒閒哋8至13厘，同內地銀行要，就算銀行肯借都講緊15厘樓上，所以內地愈水緊，有條件做殼的公司，股價好難落，但已經做咗殼的，都唔知有乜好炒？

冷門股恒天立信（00641）賣枱畀國資委旗下的恒天集團已經好一段時間，尋日終於有動作，公布深圳廠房進行城市更新，將獲10億元人民幣的拆遷補償，預期補償後會有11.7億帳面利潤之外，仲可以換番重新發展土地上3萬平方米的設施物業，以及額外100個車位。

恒天立信有來頭

後者值幾多？筆者無乜想法，但尋日恒天立信股價急升22.7%，以收市價2.64元計，市值講緊15億元，舊年年底公司淨負債5.7億元，意味如果獲相關當局審批補償，將變成淨現金公司。母公司恒天是全球最大紡織機製造商，估計總資產超過250億人仔，到底會派錢抑或向母公司收購資產，不妨繼續留意發展。