時代變遷,再有歷史悠久嘅市區老舖被重建湮沒。中環威靈頓街118號啱啱錄得登記易手,其中地舖部分為經營長達六十七年嘅南華油墨公司,因為項目位處卑利街同嘉咸街重建範圍,所以被納入為重建物業。呢個物業嘅收購價終於曝光,物業以7,643.2萬元賣畀市區重建局,反映歷史嘅洪流擋都擋唔住。

中環威靈頓街南華油墨公司經營長達六十七年。

劉Sir作為地道香港人,過去經歷過社區唔少變化,呢個位於中環區歷史悠久嘅老舖,亦一向有留意。根據土地註冊處資料,上述威靈頓街118號喺上月五日登記註冊成交,成交價為7,643.2萬元。

上述項目嘅地舖部分,係經營咗六十七年嘅南華油墨公司。睇番資料,原來舊陣時唔少結業嘅報章都係佢哋主要客源之一,油墨昔日仲喺各大報章同銀行支票見到;而年屆八十幾歲嘅老闆,亦曾經講過,話日後難以再租舖繼續經營。

重建計劃涉三地盤

事實上,市區重建局近年密密出手,喺卑利街同嘉咸街發展計劃裏面,將會由三個地盤發展作住宅、商業、酒店同零售等用途;而呢個物業就正正位處地盤C,連同地盤A與地盤B,合共佔地達約5.737萬方呎;該項目預計可發展嘅總樓面73.77萬方呎,除咗酒店及辦公大樓設於地盤C,計劃仲特別預留地盤B嘅部分空間,作售賣新鮮食品,以加強項目同現有市集嘅協同效應。

恩浩全層億二成交

起動九龍東帶動下,區內寫字樓全層特別多人吼,億京發展黎裕宗話,九龍灣恩浩國際中心啱啱賣埋最後一層全層寫字樓,單位係31樓,涉資約1.24億元,個盤共售出約五成。

另嘉華地產陸續招呼各大地產代理,參觀荃灣沙咀道嘉達環球中心商廈樓花,物業將推出招租,每層面積1.53萬方呎,意向呎租20多元。另一業主嘅觀塘偉業街雙號全幢工廈以每月40萬元租出。商舖拆售有價有市,醞釀短期拆售嘅天水圍嘉湖新城共189個劏舖,目前累收查詢逾百個。