聯儲局議息會最意外的，一定係兩句話：「秋季完成買債」同埋「之後六個月加息」，並推論最快出年四、五月加息。

美元兑日圓走勢

不過，美元跟進買盤唔算好多，美匯指數繼續喺79至81.5之間整固，因為大家對加息都係半信半疑。不過，一旦加息，應該就反映美國經濟前景相當樂觀，而包括美股同美債之美元資產亦會上升。不過即使係咁，美元真正爆升都係要等年尾收水計劃到尾聲，短線都係繼續上落市，所以一眾外幣仲有機會反彈，紐元仍然係首選。不過，貨幣始終都係一個「相對」概念，美元兌日圓就愈來愈似要一路向北。

央行政策分野咁大，基本因素繼續有利美元不利日圓，而今個星期五日本就公布二月份消費物價指數、失業率同二月份零售銷售等，如果數據唔好，睇埋過去幾星期GDP終值向下修訂、經常帳赤字創歷史新高等，大家都預期日央行有更大嘅既壓力要進一步推QE。

資金棄日債投美債

事實上，日本已經出現通脹，投資者已經唔滿足於買入回報只有0.6%嘅日本十年債，預期基金經理有更大誘因離棄日債轉投一樣低風險但回報更高的美債。美元兌日圓支持位已由100.70分別上移至101.20同101.90，只要守住101.20，後市將挑戰103.70甚至今年高位105.40。