政府於前年年底實施買家印花稅（BSD），以公司名義購買住宅樓一律要畀樓價15%嘅BSD稅款，嚇窒咗公司買家入市意欲。劉Sir知道，向來比較多公司買家嘅新盤市場，去年全年公司買家比例只係佔成交僅約2.4%，而整體市場亦只係佔咗3.7%，兩者都係有紀錄以來最少。

去年公司買家在新盤市場比例，創有紀錄以來最低。（資料圖片）

本港私宅公司買家比例

佔新盤比例降至2.4%

中原黃良昇同劉Sir講，去年一手私宅成交宗數同金額，其中公司買家僅佔咗約2.4%及7.9%，所佔比例按年跌12.5及21個百分點，創○七年有紀錄以來最低。

黃良昇話，喺去年下半年，有發展商就旗下新盤為買家提供BSD補貼，令公司買家增加，但都係集中三個豪宅新盤。

當中包括西鐵柯士甸站THE AUSTIN、九龍站天璽同埋堅尼地城Imperial Kennedy，再加上沙田雍雅山洋房項目內部轉讓個案，呢4個項目已經佔咗去年下半年一手私宅公司買家成交金額嘅85%。

按季嚟睇，去年第四季一手私宅成交當中，公司買家比例佔4.1%，比起第三季出現1.7個百分點嘅增長。至於佔成交金額比例則跌咗10.2個百分點至8.4%水平，預期今年按季數字會喺5%水平徘徊。

二手市場方面，去年公司買家佔成交宗數同總金額，佔比例約4.1%同15%，相比二○一二年跌咗4.6及6個百分點。由於舊年一、二手公司買家比例都出現回落。

所以整體而言，公司買家佔成交比例按年跌約6個百分點至3.7%，涉及金額亦減少10.4個百分點至12.9%，亦為○七年有紀錄以來低位。

低價上車盤交投報跌

另樓市觀望氣氛濃厚，低價上車盤交投減少，上月樓價300萬元或以下嘅細價樓錄573宗，佔整體成交31.1%，按月跌0.5個百分點，連續三個月報跌，按月比例更加係九五年七月有紀錄以來次低水平。