內地IPO重啟，愈睇愈似一齣肥皂劇，繼一月十日奧賽康因為估值過高被叫停招股，一月十二日隨即頒布《關於加強新股發行監管措施》，一邊放行，一邊修例，隔日內地媒體報道話中證監向近日25宗IPO、44間機構及13間承銷商展開調查。

太陽日誌

交銀預測金天醫藥業績（人民幣）

其實講到底，與其昅實班內地大孖沙及公司大股東，唔畀佢地將一班散戶當羊牯宰割，倒不如加強投資者教育，等新股上市可以需求主導，方為治本良方。

姑勿論如何，IPO重啟消息曝光後，A股確係無段好睇，尋日幾乎原地踏步，收報2,023點，結果港股高開後，一堆重磅國企威唔夠十分鐘打回原形，恒指升84點，收報22,986點，但國指全日大部分時間在水平線以下，收10,187點，跌14點。

虛擬世界尋金熱

騰訊控股（00700）同阿里巴巴由網上鬥到網下，手遊之後輪到物流，阿里巴巴搵海爾電器（01169）合作，騰訊不甘後人，以每股2.2元入股華南城（01668）9.9%股權，計劃發展一體化商貿合作，騰訊有權增持至13%，昨日華南城股價狂升60.8%，市值一日之間已進帳82億元，真係誇到暈。

騰訊同阿里巴巴，兩間加起嚟預計市值達2.5萬億元的內地網絡土豪，四圍併購鞏固線上線下勢力，點石成金的威力，十足十似九七年前光大系朱小華年代的翻版，最大分別只係今時今日兩個土豪真係相當疊水，事關內地實體經濟尤其出口及製造業景氣麻麻之下，成個股市熱錢湧晒落虛擬世界，未來幾個月，阿里巴巴上市前，斷估都係呢類被寵幸爆升股的世界，史提芬估下一波會係網上金融、彩票及視訊類公司等，唔知會唔會估中？

勢再挑戰招股價

講番正路心水奶粉及醫藥股，尋日留意隻半新股金天醫藥（02211），中段高見2.92元，平咗月初高位，可惜臨散場跟大部分二三線一齊回，最後升4.9%，收報2.75元，2.91元招股價前有點折騰。

金天是東北最大醫藥零售連鎖店，有791間零售藥店，擁有890隻授權產品，上市集資主要發展三四線城市。十二月掛牌時開1.99元，比招股價低三成二，捧場客嚇親，仲入埋潛艇部隊，保薦行大摩認真燒鬚。不過睇番近一個月金天股價漸見支持，向水面進發，尋日爆升皆因blackout過咗，大摩出報告唱好，睇3.9元建議買入，股價即刻有反應。

或者有人會認為大摩賣花讚花香，但睇數據，金天一○至一二年複合年銷售增長達65%，盈利36%，睇其他券商分析，一四及一五年增長稍為放緩，但都有平均18%，11倍PE唔貴，問題反而係要升穿2.91元招股價，等蟹貨鬆綁至有計，睇尋日大摩報告後表現，似乎短期再闖關機會唔細，鍾意短炒的，可密切留意。