市區舊樓重建價值高，部分業主都趁機全幢放售舊樓物業。劉Sir八到，由老牌家族持有嘅西灣河筲箕灣道180號及182號全幢舊樓，以招標形式放售，估計市值約1.6億元，如果連同毗鄰舊樓一併收購發展，增值潛力更加無可限量。恒地（00012）位於鰂魚涌民新街嘅舊樓重建商廈項目，如果規劃署唔反對，今日好有機會獲得城規會通過。

筲箕灣道一百八十號及一百八十二號舊樓（虛線示）全幢標售，市值估計約億六元。

老友仲量聯行曾煥平話，該行獲委託代理標售上述筲箕灣道180號及182號，大廈喺一九五六年落成，現時係兩幢6層高商住大廈連一層閣樓，地下係舖位，閣樓做寫字樓；而1至4樓就係住宅單位，項目截標日期為三月四日。

恒地申建商廈今闖關

呢個項目地盤合共佔地約2,165方呎，以重建地積比率8倍計算，總樓面可以去到約17,320方呎。

劉Sir知道，會德豐地產喺前年同埋舊年收購嘅恒生西灣河大廈同埋筲箕灣福仁大廈兩幢相鄰舊樓，每方呎樓面地價約9,200元。以此推算，今次招標嘅筲箕灣道180號及182號，市值約1.6億元左右。

由於今次標售嘅地盤面積唔係咁大，所以就咁拆卸重建效益未必好大，買家不妨考慮收購埋毗鄰嘅舊樓，估計可以騰出約1萬方呎地盤合併發展，相信潛力將會更加驚人。

劉Sir知道，城規會今日會審議多項規劃申請，上述恒地鰂魚涌民新街21至39號及英皇道852至858號舊樓重建項目，早排申請重建1幢30層高寫字樓，寫字樓同埋零售樓面佔約24.77萬及1.81萬方呎，規劃署唔反對，估計有機會成功闖關。

荃灣地改劃 可建788伙

另一方面，政府致力增住宅供應；舊年城規會將荃灣楊屋道與馬頭壩道交界用地，由「未決定用途」改劃「綜合發展區（7）」，作為住宅及商用綜合發展。

城規會今日會審議有關規劃大綱擬稿，可以起到大約106.58萬方呎，計劃提供約788個中小型單位。