上周非農數據欠佳，似乎向美國聯儲局潑了一盤冷水。

美元兌日圓走勢

上月中先剛剛宣布退市，依家出個咁肉酸的數字，市場會唔會對退市步伐重新作出評估？如果因為咁而停止退市甚至重新放水，咁聯儲局的公信力顏面何存呢？

當然以上都是陰謀論，不過筆者認為聯儲局退市步伐未受今次數據影響，月尾繼續減少100億美元買債規模，仍是大勢所趨。另一方面，聯儲局方面亦都想做好預期管理，一旦市場預期加快退市，債市一定會作出反應，美國十年債息繼續向3.5%進發機會提高，是聯儲局最唔想見到的畫面。

所以，數據公布後美債息即時回落，聯儲局反而樂於見到呢個情況，並即時有聯儲局委員發言護航，指單月數據唔足以作準。

基本因素未改變

數據令美元受壓，兌日圓即時腳軟。近期美元兌日圓持續受制於105.40，呢個係○七年六月高位至一一年十月低位的61.8%反彈阻力所在。日前兩次測試呢個位無功而回，自然有部分日圓淡友忍唔住食胡。

日線圖上連續兩日高位回落，雖然基本因素無變，日圓大方向都係要跌，但要吸引呢班淡友再重新入市，依家嘅值博率似乎唔吸引，今個星期支持位係102.50，睇圖嘅話大支持區係100.80至101.50，短線繼續調整誘因上升，阻力係104.60，止蝕宜設於此位。