上星期，美國個就業數據差強人意，債息回軟，預示市場對今年聯儲局退市的步伐預期有點動搖，按牌路，對飽受走資困擾的新興市場有利，夜期升過百點，令唔少人有所期望，結果個市尋日開高得威一個鐘，又再還原基本步，恒指由即市高位23,067點撻到落最低22,762點，最後升42點，收報22,888點。

去年不少細價股炒到飛起，原來可能同投資移民資金有關。(資料圖片)

太陽日誌

綜合大行預測酷派業績（港元）

睇番恒指10日、20日及50日線經落到去22,962、23,023及23,261點，250日線升到上22,603點，即係話，後市一旦升四百或者跌三百，已經足以破晒幾條主要平均線阻力或支持。當然從另一個角度亦可以話，平均線纏埋喺幾百點內，即使後市突破，破位引發好淡友冚倉的力量都唔會好大。

手遊股要抖抖氣

手遊股升到唔肯停，三寶IGG（08002）、雲遊（00484）及博雅（00434）統統做好，不過明顯資金開始流向其他有些少概念的股份，有周杰倫為旗下網站Ucan.com代言的文傳（00343），尋日升15.1%，收報1.67元，連埋上周五，兩日已升咗32%。印象中Ucan.com距離首次發布快將一年半，不過尋日上網一睇，仲係得網站簡介，未見傳說中的虛擬城市，見到咁，隱隱感到呢一浪網股炒風，可能真係需要抖抖氣。

近年內地手機生產商愈戰愈勇，聲勢強勁的小米，新一年的銷售目標達4,000萬部，比一三年翻一番，聯想（00992）估計今年智能手機銷量去到5,000萬，比去年升六成六。啱啱由中國無線改名的酷派（02369），在早幾日科技產品發布會2014 CES發布十五款今年推出的4G手機，並預計連同3G機，出貨量達6,000萬部，估計比一三年至少多七成。

酷派值博率不俗

姑且唔理手機生意賺到幾多錢，睇尋日聯想市值992億元，小米半年前引資估值100億美金，即780億港元，酷派市值69億元，得聯想十四分之一，小米十一分之一，如果酷派無開空頭支票，可能最值博會係佢，難怪CES發布會後，呢幾日炒到出煙。

話就話一二、一三年是美國次按海嘯以來，大市波幅最窄的一年，不過閣下手上如果揸住博彩、科網、環保及新能源股，贏到開巷當然另作別論。話時話，唔少唔多起眼的仙股毫子股炒到飛起，舊年升十倍以上的股票都有六隻之多，有幾倍升幅的更係多不勝數。

早幾日聽賓架老友講，儘管特區政府已叫停買物業的投資移民，但投資十球（1,000萬）金融資產（一○年前係600萬）搞投資移民，依然深得內地同胞歡迎，有投資公司專門兜呢一類客，貪放錢入嚟坐七年好少郁，專門搵啲友好三四線，夾手夾腳轉倉畀班移民戶，坐乾街貨後炒上去無人攔路，近一年唔少股仔一炒無回頭，井噴式爆升完街外都未知原因，唔少就係呢類操作咁話，不過大部分股民同在下呢類非內幕人士，都只係得個睇字。