唔少豪宅單位喺農曆新年前都肯減價趕出貨，令逾千萬豪宅買賣成交即時「彈起」。曾經多次拍賣都賣唔出嘅九龍站凱旋門低層單位，啱啱賣咗1,920萬元。至於多個月以來累積有3件銀主盤嘅沙田名家匯，更一洗頹風，連續沽咗其中兩伙，成交價同樣約1,800萬元。

曾經多次拍賣的九龍站凱旋門低層單位，剛以約1920萬元沽出。(資料圖片)

名家匯連錄銀主盤成交。(資料圖片)

近期逾千萬元豪宅成交個案

踏入新一年，樓市氣氛有回暖迹象。劉Sir同拍賣行老友傾開，老友話過去市場累積咗唔少購買力，加上價錢有得傾，購買力逐步喺農曆新年前釋放。

好似之前拍過幾次嘅凱旋門2座低層A室，建築/實用面積約1,176/867方呎，原本尋日透過忠誠拍賣行推出，開拍價1,900萬元，比之前調減100萬元。

上述單位吸引買家喺拍賣前承接，成交價約1,920萬元，比市價略平，建築/實用呎價約16,327/22,145元。

與此同時，名家匯亦雙雙有銀主單位賣出，其中1座低層B室，建築/實用面積約2,412/1,811方呎，同樣喺拍賣前成交，估計售價約1,750萬元，比開拍價1,800萬元，低50萬元或2.8%，建築/實用呎價約7,255/9,663元。

嘉逸居開價1380萬

此外，另一伙位於2座中層A室連車位嘅銀主盤，估計以約1,800萬元賣出，單位建築/實用面積約2,279/1,699方呎。

上述兩單位成交價，都較單位原購入價為低。

另外，東半山東山臺嘉逸居低層B室，建築/實用面積約1,090/763方呎，下星期以1,380萬元開價拍賣；睇番土地註冊處資料，上述單位登記業主為錢美勇，同前亞姐施綺蓮母親名字相同。

高威閣車位搶貴51%

除千萬豪宅外，細價物業亦受追捧，柴灣高威閣1個連約車位，尋日以57.5萬元賣出，比開價38萬元搶高51%，現月租約2,150元，回報率約4.5厘；而深水埗深の都1樓商場單號舖位，建築面積50方呎，開價28萬元，同場以30.6萬元拍賣成交，搶高9.3%，建築呎價約6,120元。